ZALEN June 12, 2025 : Sakura/Japan Science High School Program-a tel tur Mizo zirlai pali, State aiawh a tel turte chu School Education Director Angela Zothanpuii chuan vawiin khan a vailiam. 

Japan Science & Technology (JST) Agency leh Ministry of Education-te bul tumin he programme hi kal pui a ni a, heta tel tur hian Ministry of Education, Govt. of India chuan February thla atang khan thlanna (selection process) hi a lo kalpui tan tawh a ni. 

Mizo naupang thlanchhuante chu hengte hi an ni: 

K.Darthangmawia Govt. Mizo HSS

FC Lalruathlui Govt. Mizo HSS

Zorinzuali Bawlchhim, MICE

Gideon Malsawmtluanga, Govt. Zemabawk HSS 

Heng naupang thlanchuahte hian state dang atanga thlan chhuah naupangte nen, NCERT Delhi-ah June ni 14 hian Orientation Programme an hmang ang a, Ni 15-ah Tokyo an pan dawn a ni. 

Japan-a an cham chhung hian Science & Technology lama Japan hmun pawimawh hrang hrang University of Tokyo te, Japanese Aerospace Exploration Agency (JAXA) hmun te, National Institute for Materials Science (NIMS) te, MIRAIKAN leh hmun hrang hrang an tlawh dawn a ni. 

Heng naupangte international flight, thlenna leh ei leh in zawng zawng senso hi Ministry of Education, Govt. of India leh JST hian a tum sak vek dawn a ni.