US sipai thlawhna, mi paruk chuanna chu Japan chhimthlang lama Yakushima Island-ah a tla.

Japanese Coast Guard chuan an tlakna bulah hian mi pakhat thiin an hmu tawh tih an sawi.

Japan-a NHK broadcaster chuan CV-22 Osprey hybrid plane hi Yakushima Airport-ah a engine pakhat zawk kâng chungin tum a tum niin a puang a. US chuan engmah sawi a la nei lo.

Helicopter leh turboprop aircraft atana hman theih, Ospreys hi tun hnai kum eng emaw zat chhung hian chhiatna rapthlak tak tak a lo tawk tawh thin.

Nilainia tla ta thlawhna hi Yamaguchi prefecture khawthlang lama Iwakuni base atanga thlawk chhuak, an ram chhimthlang tawp, Okinawa-a Kadena base pan nia hriat a ni.

Japanese defence ministry chuan thlawhna hi an radar atangin Nilaini chawhnu dar 2:40 (India-a chhun dar 12:10)-ah a bo niin an sawi.

Coast Guard chuan a hnu minute ngaah kohna dawngin thlawhna hi a tla tih an sawi.

Lawngleng paruk leh helicopter an tir chhuak nghal a. Tlai dar 4:00-ah khan helicopter atang hian thlawhna keh them ni awm tak leh lawng them ni awm tak an hmu tih an thupuangtu chuan a sawi.

A tirah chuan thlawhnaa chuang hi pariat tih phawt a ni a, a hnuah Coast Guard hian paruk an ti leh ta zawk.

Yakushima bul tuipuia thlawhna keh them ni awm tak thlalak pawh an tichhuak tawh.

Thil thleng hmutu pakhatin tual chhung TV hnenah thlawhna hi a tlak dawn hian a vir a, a puak zui a, tuipuiah a tla niin a sawi.

Tla ta ruala thlawk chhuak tho, Osprey thlawhna dang chu him takin Yakushima-ah a tum niin tual chhung thuneituten an sawi.

Kagoshima prefecture-a Yakushima hi Japan chhim lama Kyushu island-a awm a ni.

He hmunah hian US sipai 50,000 chuang zet an awm mek.

August thlaah pawh khan Osprey thlawhna chi dang deuh chu Australia hmar lama sipai nunchan zirnaah chesualin US marine pathum telin a chuang mi 23 an thi.

Kum 2017 khan Australia hmar lam tuipui kam bulah Osprey thlawhna hi a lo tla tawh a, marine pathum an lo thi tawh bawk.