ZALEN July 14, 2025 : Joint Civil Society of Mizoram (JCM) hnuaia heng Pawl hrang hrang te chuan vawiin khan NH 306 & 06 kawng chhia, motor tlan theih lohna lai hi JCM Team-te chuan vawiin July ni 24, 2025 hian a hmunah an tlawh leh a, tuna hnathawh dan an hmuh chinah 'Zoram Hnatlang' koh tura ruahmanna an siam chu ngai rih lovin an hria. 

JCM te helai hmun an tlawh lai hian Adviser to CM TBC Lalvenchhunga pawhin a hmunah a lo tlawh a, motor kal theih a kawngpui siam dan tur leh hmalak zel dan tur te an sawiho a ni. DC Kolasib Robert C Lalhmangaiha leh a thawhpuite hmalak dante leh ruahmanna te an ngaithla. NHIDCL ten PWD Mizoram, MTA leh Drivers/Owners Association hrang hrangte tawiawmna leh tanpuina in, an theihtawpin hma an la tih hmuh theihin a lang an ti a. Hetiang hian tha thlah lova, hmala chhunzawm zel turin an beisei bawk an ti.

Hetiang hi thil awmdan anih avangin Zoram Hnatlang koh tura an lo ruahman chu hnatlang koh a ngai rih lovin an hria a. Hnatlang tura lo inpeih sa te, a tul anga sum leh pai, tha, hmanrua leh lirthei te thawh tura lo inkau sa zawng zawngte leh mahni awmhmun atanga rinawm taka lo thlawp tlat tute chungah lawmthu an sawi.

JCM chuan kum tin tun ang hun laia kawngpui kal hleihtheih loh a a awm ziah thin hi Sawrkar inthlahdah vang leh remruatna fel awm loh vang niin an ngai a. Mizoram tana kawngpui pawimawh tak, NH 306 & 06 -Mizoram 'Life Line' hi lirthei tlan theihna atana enkawl reng tur leh a siamthat hna pawh chak taka kalpui zel turin NHIDCL te an phut. Hetiang bawk hian a bikin NH 44A Darlak leh Tuidam inkar te, Mamit leh Bairabi inkarte, Mizoram chhim lam leh khawchhak lama kawngpui chhe tak takte pawh siamtha chhunzawm zel turin Mizoram Sawrkar an ngen bawk a ni.