ZALEN July 25, 2024; India international striker hlui Jeje Lalpekhlua, MLA chuan tukin zing khan Republic Veng Field-ah RGSA Grassroots jersey a tlangzarh.

Jeje chuan, "Hlawhtling tur chuan thuawih a ngai a, nu leh pa bakah coach-te thu zawm hi a pawimawh. Ka hlawhtlinna chhan pawimawh tak pakhat chu nu leh pa thu ka awih hi a ni.

"Kan hlawhtling a nih pawhin min zirtirtu kan coach te bakah kan chawr chhuahna kan hre reng tur a ni a, chapo loh tur a ni," tiin naupangte a fuih.

India ram striker ropui zinga tel pha Jeje chuan sawi chhunzawmin, "Footballer ni tur chuan thawhrim a ngai a, tumruh a ngai bawk. Beidawng hma tan I League emaw ISL emaw India team-ah a tel theih loh," a ti a, naupangte chu phone khawih tlem turin a hrilh a, chaw ei leh mut ṭhat a pawimawh thu a sawi tel bawk.

Grassroots Jersey hi VZ Market (Zion Street) leh VZ Print (Mission Veng) ten an sponsor a, naupang hnenah hian a thlawn vekin an sem.

RGSA naupang Abraham Malsawmhlua leh Bernard Lalchhanhima te chu Mizoram aiawha National Sub Junior C'ship khel turin an tling a, Lalrinsanga chu FIFA AIFF Academy (2027 World cup Under 17 India team tur) a awm turin an thlang bawk.

RGSA Grassroots hian Reliance Naupang League an khel a, naupang 150 bawr vel an inzir mek a ni.