Aizawl May 18, 2024 : South Tuipui bialtu MLA Jeje Lalpekhlua chuan vawiin khan SASCI sum hmanga hnathawh leh a MLA fund hmanga hnathawh leh a hmunah a enfiah a, Hnahthial chawmtu lui thenfai hnatlangaa thawkchhuak te tan Cheng 10,000 a hlan bawk.

Jeje-a hian tukin khan Takam Tiau kawng MLA fund-a laih mek te, SASCI sum hmanga hnathawh Turf Ground panna retaining wall siam te, Denlung leh DC Office panna kawng siam mek te a hmunah kalin a enfiah a ni.

Kohhran pali awmna BCM Hnahthial South Pastor Bial, Thalai Kristian Pawl (TKP) leh District Urban Development & Poverty Alleviation (DUDO) tang kawp chuan vawiin khan Environment Humhalh Hnatlang an nei a, he hunah hian Hnahthial khawpui tui tlan Tuichang lui fintu luikawr thenfai hna an thawk a ni. Hnatlang te thingpui inna tur hian Bialtu MLA Jeje Lalpekhlua chuan Rs. 10,000 a hlan a ni.

Jejea hian chawhnu lamah MLA Office, Hnahthial-ah Mizo Upa Pawl (MUP) Sub Headquarters Hnahthial hruaitute bakah YMA Sub Headquarters hruaitute kawmin thil pawimawh a sawipui bawk. Jejea hian Thawhtanni-ah lamah meeting a neih avangin vawiin tlai khan Aizawl a pan leh nghal a ni.