American singer, actress leh dancer ni bawk Jennifer Lopez chuan tun hnai khan a pasal Ben Affleck nen an inkar a sawi chhuak a, a pasal hian a rinawm loh san a nih vaih chuan a chhuahsan nghal tur thu a sawi.
 
Jennifer Lynn Affleck hian a pasal Ben Affleck chu rinawm tura a duh thu sawiin, a rinawm loh san tih finfiahna a neih erawh chuan a chhuah san nghal tur thu a sawi a ni. Kum 53 mi J.Lo leh American actor Ben Affleck (50) te hi nikum mai khan an innei a, inphatsanna hun pawh niin a la lang lo. 

Hetih rual hian pasal pathum - Ojani Noa, Cris Judd leh Marc Anthony te then tawh J.Lo a fimkhur hle a, a pasal hian a rinawm loh san a nih vaih chuan kal san nghal hmiah a tum a ni. 

Ben Affleck hian a nupui hmasa Jennifer Garner lakah fanu pahnih - Violet (17) leh Seraphina (14) te a nei a, J.Lo pawh hian a pasal hlui Marc Anthony lakah khan fa phir - Maximilian leh Emme te a nei ve bawk.  

Milar nun
Kan ngaihsan sap milar kan tihho te khuan nupui pasal chungchang hi an kalpah viau niin a lang a, nghet taka rei tak innnei sawi tur an tam lo hle. A tam zawk khu chu innei ve zuai a, inthen leh mai an ni deuh fur. 

An eizawnna kawngah erawh an entawn tlak viau a, nuam taka khawsa thei turin an thawkrim hle. 
Chung zingah chuan Jennifer Lopez leh Ben Affleck te pawh an tel a, an eizawnna lamah chuan an thawkrimin an hlawhtling hle. Kawppui nghet neih lamah erawh an hlawhchham dun viau a, J.Lo tan Affleck hi a pasal palina a ni tawh! Affleck erawh a zia hret a, J.Lo hi a nupui pahnihna chauh a la ni thung.