Aizawl: Manipur leh Mizoram a Power lama thuneitu sang Joint Electricity Regulatory Commission chuan April 2020 atanga hman tan turin eng chhit man unit khat Rs. 4.96 ni thin chu Rs. 6.28 ah a ti sang a, unit khat zela a man punna chu Rs.1.32 a ni.

P&E Department-in kum thar 2020-21 atana tariff hman tur a dilna hi JERC chuan ni 28.2.2020 khan Hotel Floria ah public haring neiin an thutlukna hi March 20,2020 khan order a ti chhuak a. Public hearing-ah hian kum tina thil man pung leh power mamawh pung avangin tariff tihsan sawiselna a awm hran lova, mahse P&E Deptt. rawtna ang em em a sanga tisang lo tur leh tihsan anih pawha consumer te tana phur rit tak nilo tura rawtna a lian hle. Electricity Act-2003-in a sawi angin power supply enkawl nana Revenue sum mamawh Aggregate Revenue Requirement (ARR) hi power hralhna atanga hmuh let tur a ni a. Chuvang chuan kumtinin JERC hian tariff thar a bituk thin a ni.

P&E Deptt. hian kumin financial year 2020-21 chhunga power supply enkawl nan ARR Rs.684.95 crore phal sak tura an dil laiin Commission chuan Rs. 463.93 crore a bituk sak a. P&E Deptt hian an Revenue sum mamawh hmuh let nan hian 89.52%-a tariff hmanlai tihsan phalsak turin an dil a. Commission chuan ARR bituk hmuh let nan 26.59%-in tihsan a phalsak a. P&E Deptt hian consumer te eng pek nan unit khat zelah Rs.10.04 vel a mamawh a, chuvang chuan sawrkarin consumer te unit khatah subsidy Rs. 3.76 zel a pek sak dawn a ni. Sawrkar subsidy pek zat tur hi a vaiin Rs.160.67 crore a ni. Kumin 2020-21 chhunga consumer te eng hman zat tura beisei zat hi 427.51MU a ni a, heta tang hian revenue Rs.268.46 crore hmuh beisei a ni.

P&E Deptt hian kumin chhung hian Small Hydel Project te atangin 40.09 MU pekchhuah theih an tum a, phai lam leh Tuirial HEP atangin 654.26MU lei an tum a, Tuirial HEP atangin free share (a thlawna Mizoram chanpual) 16.82MU neih theih an beisei bawk. Power lei nan hian Commission-in Rs.338.74 crore a bituk sak a ni.

Tariff thara mi nawlpui Kutir Jyoty (KJ) leh Domestic LT consumer te Tariff pun dan chu hetiang hi a ni:

(1) KJ ah hian Fixed charge/ connection Rs.20/- atangin Rs.25/- ah tihsan a ni a, energy man erawh chu tihsan a ni lo.

(2) Domestic LT-ah hian kW khata Fixed charge hman lai Rs.50/- hi tihsan a ni lova, energy man erawhchu hetiang hian tihsan a ni-
(i) First 100kWh (Unit 100 thleng) : Rs.3.10 atangin Rs.3.30/kWh
(ii) Next 100kWh) (Unit 100 dang) : Rs.3.60 atangin Rs.4.80/kWh
(iii) Balance above 200kWh (Unit 200 chung lam):Rs.5.10 atangin Rs.5.30/kWh

JERC hian Manipur-a eng chhit man pawh a tisang a. Hetia tihsan ve ve anih hian Manipur-a eng chhit man (average tariff) hi Rs.6.43/unit a ni a, Mizoram-a average tariff Rs.6.28 aiin unit khat zelah 15 paise in a sang ang.

Zalen zawhna chhangin Mizoram Consumers Union President Prof. Chawngsailova chuan 'a sang an ti hle' niin a sawi a. "Keini hi stake holder kan ni a, kum dangah chuan public hearing ah min sawm thin a. Kumin ah erawh chuan sawm kan ni lova, heti tak maia tihsan a ni hi tha kan ti lo hle a ni," a ti.