Commonwealth Games 2022 neih mekah Mizo weightlifter Jeremy Lalrinnunga chuan mipa kg 67 category-ah gold medal a la. Kg 300 chawiin Commonwealth Games record thar a siam bawk. 

Lalrinnunga hian snatch ctegory-ah kg 140 chawiin record ding lai a khum a, Clean and Jerk category-ah kg 160 chawi bawkin a pahniha belh khawmin kg 300 a tling phak a, Commonwealth Games-a 67kg weight category-ah amah aia rit chawi thei an la awm ngai lo. 

Snatch category-ah hian huaisen takin final attempt-ah ama record khum tumin kg 143 chawi a tuma, mahse a hlawhchham hlauh. Kg 130 chawitu Edidiong Joseph Umoafia chu pahnihna niin Samoa's Vaipava Ioane chu pathumna a ni a kg 127 a chawi. 

Jeremy Lalrinnunga chuan “Warm-up ka nei tha a, mahse point ka hmuh hnu khan ka mal hmalam leh tihrawl chhung lam tha ka ti na a, hun rei vaklo chhung chu ka kal thei lo nghe nghe. Warm-up ka neih lai pawhin kg 140 chunglam hi chu ka chawi zo lo a ni," a ti. 

Jeremy Lalrinnunga hi India ram Prime Minister Narendra Modi pawhin lawmpuina a thawn tawh a, Modi chuan,"Ka pachak-a chuan historya siam ta, a vawi khat nan gold medal a hlawhchhuak bakah CWG record ropui a siam bawk. Kum naupangte niin hlawhtlinna ropui tak a hlawh chhuak a, a kal zelna turah duhsakna sang ber ka hlan e. Jeremy Lalrinnunga ka lawmpui tak meuh a che," a ti.

Mizoram Sport Minister Robert Romawia Royte chuan, Jeremy chu chhuanawm a tih thu leh Mizoram atanga Commonwealth Games medal awrh hmasa ber  a ni thei chu chhuanawm a tih thu a sawi a, India weightligting tana hnuhma pawimawh a hnutchhiah avanga kan chhuan thu a sawi. MPCC President Lalsawta pawhin, congress sorkar hunlaia Catch Them Young atana bultan Jeremy-a'n CWG-a India tana gold medal a chawi chhuak thei chu a lawmpui thu a sawi bawk.

Jeremy Lalrinnunga hian 2018 Youth Olympic Games-ah gold medal a lo la tawh a, Commonwealth Championships 2021-ah Gold medal a lo la tawh bawk.

Jeremy-a hma hian Manipuri weightlifter, Olympic medal pawh lo awrh tawh Mirabai Chanu chuan India tan Gold medal a lo hlawh chhuak tawh a, tunah hian India-in gold medal pahnih an la ve tawh a ni.