Zaithiam Joseph Zaihmingthanga chu vawiin chhun dar 1:20 khan heart attack avangin a boral. Kum 42 mi Joseph-a hi zaninah tlaivarpui a ni ang a, naktuk chhun dar 12:00 ah an chenna Ramhlun North-ah vui liam a ni ang. 

Joseph Zaihmingthanga hi vawiin chawhma lam pawh a inkhawm a, inkhawm ban hnu hian an inah a tlu a, nikhaw hre loin a awm zui. LRM Hospital panpui nghal ni mah se a nunna an chhan thei ta lo a ni.

Joseph-a te hi Ramhlun North veng a khawsa an ni a, fapa 2 neiin a fapa upa zawk chu kum 16 mi a ni tawh a. A fapa upa zawk chu naupang chawhnu inkhawmah zai hruaitu a nih avangin inkhawm turin ngaih tha takin a kal a, a zai hruai lai chu apa thih thu hrilh turin an ko chhuak a. An hrilh a hai unau takzet a ni.

Joseph-a thih thu hian Zoram dung leh vang a deng chhuak rang hle a, mipui pawh a barakhaih hle. Naktuk zan hian Kristian Thalai Pawl (KTP) Chhingchhip Mualpui Branch chuan member 100 inkhawm tlin zan 'Project 100' an hmang dawn a, he hunah hian speaker tur a ni nghe nghe. 

A chunga vanduaina thleng chungchangah hian Mizo Zaimi Inzawmkhawm (MZI) chuan thuchhuah hetiang hian an siam, "Kan member Joseph Zaihmingthanga (42) chuan vawiin (May 7, 2023) chawhnu dar 1:20 khan chatuan ram min pansan a. Naktuk (May 8, 2023) chhun dar 12-ah Ramhlun North, Aizawla an chenna in-ah vui a ni ang.

MZI chuan Joseph Zaihmingthanga kan ui a, kan sun a, a kalsan a fa te leh a chhung te zawng zawng kan tawrhpui a, Pathian thlamuanna chang ngei turin kan duhsak takzet a ni," tiin. 

Joseph-a hian uitu a ngah hle a, a zai leh a thuawi ngainatute tan chuan channa nasa tak a ni.