Aizawl May 13, 2024 : Vawiin khan Joseph Zaihmingthanga Memorial Societry (JMS) te chuan Officer Incharge, Cyber Police Station, Mizoram, Aizawl hnenah May 8, 2024 zana Joseph Zaihmingthanga Tribute Concert, In Aid of De-Addiction Centres an buatsaih Rimawi Khawvel Youtube Channel-in Live a an pekchhuah lo la chhawng anmahni Youtube channel-a lo dah te lakah FIR an thehlut.

FIR an thehluh-ah hian JMS te chuan Jerry's Video Production, Mamuan Hauhnar, Thiangtlangpa Official, Puia Hrahsel, Mizoram Mit leh Beng, Laizom Saulim, J&S Official chanel, Luangchhuak leh Mapuia vls te bakah mi thenkhat ten he concert zan atanga tun thleng hian an Youtube channel-ah an duh lai lai cut-in an upload tih an tarlang.

Concert huaihawttu te chuan hetianga an lo upload avang hian nasa takin an tichhia tih an sawi a, sum leh pai seng an organised na leh De-Addiction Centres tanpuina atana G-pay hmanga vehbur an khawn pawh nasa takin a nghawng an ti a, OC hennah hian a rang thei ang ber leh dan anga action laksak turin an ngen a ni.

JMS te chuan FIR an thehlut hian a tha zawngin Youtuber te hnena nghawng a neih ngei an beisei a, Music Event lian tham organised tuten hetilama harsatna an tawh thin te a sutkian ngei an beisei thu an tarlang. FIR hi Chairman, JMS & Editor, Rimawi Khawvel Music Magazine PC Lalthakima hmingin an thehlut a ni.