Aizawl June 28, 2023 : UPSC Prelims 2023-ah Mizo thalai 13 an tling a, anni hi mains exam la hmachhawn leh tur an ni a, tunah hian MYC chu Super IAS Programme entrace exam turin a inbuatsaih leh tawh a, July 10 hian entrance exam neih tur a ni.

Super IAS Programme entrance exam hi Vision IAS, New Delhi te chuan an rawn buatsaih dawn a, tun tumah hi chuan lak zat tur bithliah a awm lo a, UPSC Exam tura tha tawka an hriat te an la tawp dawn a ni. An lak dan turah erawh tehna mumal tak an nei dawn tih MYC Chairman Vanlaltanpuia, MLA chuan a sawi.

UPSC Mains exam hmachhawn tur mi 13 zinga mi 3 te hian Delhi lamah exam an hmachhawn ang a, a dang 10 te hi chuan MYC Coaching Centre atangin exam hi an hmachhawn thung ang.

MYC hian Super IAS Programme hnuaiah hian zirlai 60 chuang an sponsor tawh a, MYC Super 20 atan khan Cheng nuai 40 vel sen niin MYC Super 40 atan khan Cheng nuai 150 vel sen niin a vai hian Cheng nuai 190 vel sen a ni tawh a ni.

Mizoram Youth Commission leh CHARCOS GLOBAL thawhona hnuaiah UK-a registered nurse thawk tur Occupational English Test (OET) paltlang tawh mi 12 an awm thu sawi a ni a, International English Language Test System (IELTs) paltlang tawh mi 7 an awm bawk. MOCH hnuaia Coaching Class kal atangin mi 10 te chu One time assistance Coaching Class kalna leh Exam fee tan 50,000 tumsak an ni thin. IELTs Exam tur te hi Coaching Class kalna leh Exam fee 50% tumsan an ni thin bawk.