Aizawl June 27, 2023 : Union Home Minister Amit Shah-a'n Zokhawsanga Assam Rifles insawnna tur a hawn ruala hawn tel, a taka la hman loh Aizawl Smart City Project hnuaia hnathawh Integrated Command & Control Center (ICCC) chu July 3, 2023 atanga khian a taka hman turin ruahmanna siam a ni. Deputy Chief Minister chuan Go Live turin a hawng ang.

ICCC atanga hian Aizawl khawpui chhunga mihring leh lirthei chet tlan dan te thlir theih a ni dawn a, Traffic Police, Police, Aizawl DC leh AMC tan a bik takin a tangkai hle tura ngaih a ni. lirthei chet vel dan thlir nana a tangkai piah lamah, rukru chhuina atan leh khawpui chhung sik leh sa dinhmun leh boruak lum leh vawh dan te thlengin ICCC atang hian a hriat theih dawn a ni. Heng te vil tur hian Camera ringawt pawh 296 dah a ni. Sik leh sa lo teh tur leh thil hrang hrang atan khawl chi hrang hrang hmun hrang hrangah dah a ni bawk.

Traffic Police tan hian lirthei bo zawnna kawng a tangkai hle tura ngaih a ni a, Lirthei number atanga ringawtin lirthei chet dan thui tak a hriat theih a, Intihpalh nikhuaah te pawh hei hian thui takin a pui thei dawn a ni. ICCC atan hian camera hrang hrang hman a nih avangin thlalak pawh a chiang hle a, rukru leh misual chhuina kawngah pawh Police tan tangkai hle tura ngaih a ni bawk.

AMC tan pawh bawlhhlawh paih kawngah thui tak a pui thei dawn a, AMC area chhunga kawng sira bawlhhlawh paih chhui nan pawh tangkai hle tura ngaih a ni a, a bik takin AMC Garbage Truck te phei chu GPS vuah sak vek tawh an nih avangin an thlenna chin hriat theih vek a ni.

Tin, Aizawl luhka, Trinity, Zemabawk, Durtlang leh Hunthar lamah lirthei chhuak leh lut lo vil tura a bik taka dah a ni bawk.