Aizawl January 5, 2023: Public Health Engineering (PHE) Department chuan an department hnuaia Assistant Engineer (AE)/ Sub-Divisional Officer (SDO) chin chunglamte ko khawmin Review Meeting an nei a. Report atanga a lan danin tunah hian Mizoram puma tui connetion nei zat hi 72% vel a ni a, July-ah hi chuan In tinah connection pek hman an tum.

Vawiina Multipurpose Hall, Berawtlanga kum kaltaa an hnathawh thlirletna leh an hnathawh mek leh hmachhawp atana inbuatsaihna ni hnih awh tur hawnna hi Deputy Chief Minister Tawnluia chu khuallian niin a hmanpui.  Tawnluia chuan PHE ten Mizoram mipuite tan an hnathawh hi a pawimawh tak zet a ni, a ti. Scheme hrang hrang an khawih zingah kum rei vaklo atang khan Mizoram khaw tin, in tina mahni inchhung ngeia tui an dawn theihna tur Jal Jeevan Misssion lian taka kalpui leh mek a ni tih a sawi a. Thawktu indaihlohna karah an hna a pung zel a, chutichungin thawktuten an mawhphurhna tha taka an kengkawh theih chu lawmawm a tih thu leh achievement pawimawh tak tak an neih thu a sawi. 

PHE hian Mizoram puma Chhungkua 1,34,028 awm mekah 97,079 hnenah tui thianghlim in tur an pechhuak thei tawh a. Hei hi za zelah 72 vel tling tawhin an hmabak chhungkaw 36,949 tuam chhuah tumin hma an la mek a, kumin July hian Mizoram chhunga Chhungkaw tin tetui connection hi pek chhuah vek an tum a ni. 

Jal Jeevan Mission hnuaiah Mizorama khua leh khaw per awm belhkhawm 742-a 333-ah he scheme hi an kalpui tawh a. A bak 515 ah hmalakna a kal mek a. JJM hnuaiah scheme 848 kalpui niin hemi hnuaia scheme 26 atan State Level Sanction Committee a thu tawh a, Sawrkar Laipui pawmpuina an nghak mek a ni.