Electric scooter dang Ola S1 Pro, Simple One leh TVS iQube te elpui turin Ather 450X thar chu naktuk ni July ni 19, 2022 hian tlangzarh a ni dawn a, ₹ 1,40,060 man bawr vel a ni ang.

India ram chhungah electric two-wheeler siam chhuah thar an uar chho tan hle a, kan hma hun thlir chung leh environment tana hnawk lo tur ngaihtuahna kawngah pawh inelna a sang chho hle a ni.

Ather Energy hi tunlaiin India ram chhunga electric two-wheeler hralh kal ber pakhat a ni mek bawk. Bengaluru-a hmunpui nei EV  ten 450X model an siam chhuah thar pawh hi hralh kal leh hle tura ngaih a ni. 

Ather Energy model thar 450X tlangzarh hun tur hi Twitter lamah puanzar a ni tawh a, new Gen 3 450X electric scooter hi July ni 19-ah tlanzarh a nih tur thu hi an sawi chiang tawh a ni. Gen 3 450X electric scooter a awm dawn takah chuan 450X version dang chu siam chhunzawm a ni tawh lovang.
 
450X thar hi an model hman mek aiin cheng 60,00 velin a to belh hlek dawn a, chutih rualin Ather 450X thar hi Lithium-ion battery hi a hma ami aiin a chak bakah a daih rei tawh zawk dawn a, 2.6kWh unit thin kha 3.66kW a nih tawh dawn vangin Mizoram lamah pawh a hmantlak viauin a rinawm. 

Setting hmasaah 450X hian riding mode panga neiin Warp Mode, Sport Mode, Ride Mode, Eco Mode leh new Smart Eco Mode te a nei a, Second setting-ah erawh siam danglam deuhin battery chakna hi tihhniam deuh a nih bakah riding mode pali dah a ni a, Warp mode an telh lo a ni. 

Battery pack a len tak avangin a peak power output pawh a chak sawt dawn tih a chiang a, vawi khat charge pawhin a thleng thui thei hle tawh dawn a ni. Battery pack thar-ah hian setting 1-a vawi khat charge-in km 146 bawr thleng thei tura ngaih a ni a, setting 2-ah erawh tlahniam deuhin km 108 vel vawi khat charge-ah a thleng thung ang. 

Ather 450X hian LED light a hmang vek dawn a, touchscreen cluster hi 4.2-inch vel niin Bluetooth a connect theih ang. Heng bakah hian 4G LTE SIM connectivity, Over the air (OTA) updates, onboard navigation, digital document storage, music leh call controls, reverse mode thlengin a awm bawk ang.