2025 India Panorama Jury-ah Mizo tlangval Napolean RZ Thanga a tel

Aizawl: November ni 20 atanga 28 hian Goa ah 56th International Film Festival of India 2025 neih a ni dawn a, He huna film chhuah tur endik leh thlanchhuah hna thawk turin November 13 khan India rama film lam mithiam mi 13 ruat an ni a, heng zingah hian Napolean RZ Thanga, Mission Veng a tel.

  October thla chhung khan Mumbai-a NDFC hmunah Feature film 450 atangin film 30 56th International Film Festival of India (IFFI) a chhuah tur an thlan chhuah leh endik hna chu Jury team te hian an thawk a ni.

  Panoramo Jury-a Mizo tel vawikhatna niin Napolean hian Mizo zingah chuan hma a hruai ta a ni. Ani hi Documentary film lamah sulhnu a nei tha a, award te pawh la tawhin a documentary pawh Film Festival ah tihchhuah a lo ni tawh thin a ni.

Mizoram Police leh AR ten Vaibelchhe 45 man Meth an man

Aizawl: Mizoram Police leh Assam Rifles te chuan ruihhlo an dapna kawngah November 13, 2025 khan Methamphetamine Kgs 15, cheng vaibelchhe 45 man hu an man.

  Drugs che vel a awm tih an hriat thu an dawn atangin Ngopa-Saitual Road-ah team pahnih te hian hma an la a, November 12-13, 2025 khan Ngopa khawchhungah joint operation an nei a, Assam Rifles te chuan vehicle check post an siam a, heng drugs phurtu rinhlelh lirthei atang hian Methamphetamine Kgs 15, cheng Vaibelchhe 45 man hu a chhut chu mi pahnih kut atangin an man ta a ni.

  Rabizul Haq. s/o Sazuddin leh Naasiruddin s/o Adul Hassan, Barpeta, Assam lam mi chu an man a, heng an mi man te leh an lirthei hi hmalak zui zel atan Saitual Police kutah an hlan a ni.

Nupa kut atangin heroin man

Aizawl: Lunglei Police (DSB Staff) leh 20 Assam Rifles tangkawp te chuan November 12, 2025 khan Venglai leh Rahsi veng inrina bulah Lalhlimawmi leh Lalhmingmuana te nupa Lunglei Venglai nia inchhalte hnen atangin Heroin No 4, Hawng 4 an man a. Lunglei Police Stationah thubuai siam sak an ni.

  DSB Lunglei leh 20 Assam Rifle, Lunglei te chuan Lalhlimawmi leh Lalhmingmuana te nupa kut atang hian Heroin Hawng 3, Gram 36.140 tualchhung hralhna rate a Rs.1,08,420/- man hu an man bakah an chenna In, Lunglei Venglai atangin Heroin hawng 1, Gram 11.200 Rs.33,600/- man hu an man sak bawk a, Lalhlimawmi leh Lalhmingmuana te nupa kut atanga Heroin an man zawng zawng hi Hawng 4, Gram 47.34 Rs.1,42,020/- man hu niin mobile phone pakhat an man tel bawk a, An nupa hian man nghal niin Lunglei Police Stationah thubuai siam sak an ni.

  Ruihhlo man chungchang an chhui zui zelnaah Lunglei Police te chuan No 4, kengtu ni ngeia hriat mi pahnih C Lalkrosthanga Ngharchhip, Hnahthial Dist. leh Marry Dawn, Myanmar te chu man leh in, Lunglei Police Station-ah ruihhlo kaihhnawih thubuai bakah Immigration and Foreigner Act, 2025 hnuaiah thubuai an ziaklut a ni.

Mitdel Evan Zadawla a thi

Aizawl: Pathian thu hriltu ropui Mitdel Zadawla, kum 89 chu November 12, 2025 zan khan a thi.

  Synod Hospital, Nephrology Ward Durtlang chuan thuchhuah siamin, Evan Zadawla kum 89, mitdel, Synod Revival Speaker chu tunah hian a thaw lo tawpin, rawng a bawlsak thin Lalpa hnenah chawl tawh turin a lei taksa chu van kohna a chhansan mek a ni tih an tarlang a. 

  "Tui taka muhilin a thaw a muang riai a, Doctor leh Nurse ten theih tawp chhuaha kohkir an tum chungin, A Lalpa hnena haw tawh tur chu an chelh ding zo ta lo a ni," tiiin "Mitdel awm tawh lohna khawpui, hmaichhana Lal Isua hmua hlim taka chatuana chawl tawh turin a lei taksa a thlah ta. Thlamuang takin a chawl ta," tiin an thuchhuahah chuan an tarlang a ni.

  Evan Zadawla ruang hi a chenna Saron veng Taitesena Section ah tlaivarpui a ni a, November 13, 2025 khan Saron veng Presbyterian Kohhran Biak In Jubilee Hall-ah vuina inkhawm neih a ni a, Pastor F Lalhmingthanga'n a vui a ni.

UD&PA leh PHE ten AMRUT leh SBM Scheme kalpui dan turah thawhhona thuthlung ziak

Aizawl: Urban Development & Poverty Alleviation (UD&PA) Department leh Public Health Engineering (PHE) Department-te chuan November 13, 2025 khan Sewage Treatment Plant, Chite-ah Mizorama Atal Mission for Rejuvenation and Urban Transformation (AMRUT) leh Swachh Bharat Mission (SBM) scheme kalpui dan turah thawhhona thuthlung (Charter of Convergence) an ziak . 

  He hunah hian K. Sapdanga, Minister, UD&PA chu khuallian niin, Prof. Lalnilawma, Minister of State, PHED chu khualzahawm a ni a. Thawhhona thuthlung hi UD&PA aiawhin Lalmalsawma Pachuau, Secretary leh PHED aiawhin Zodingpuii-te’n an hming an ziahhnan a ni.

  SBM(U) hnuaia Used Water Management (UWM) component hnuaia fund allocation Rs. 88.84 crore awm chu PHED in a thawk (execute) ang a, UD&PA-in fund a ruahman ang.

  AMRUT Mission hnuaiah allocation Rs 157.78 cr a awm a. Hemi atang hian First Instalment pumpui leh second instalment tlem, a vaiin Rs 45 cr vel hman a ni tawh.

  AMRUT component ho zingah Water Supply leh Sewerage & Septage Management te chu PHED in an enkawl a, Water Body Rejuvenation leh Green Space & Parks te chu UD&PA in an enkawl a ni.

AMC huamchhunga Local Council ten Dengue chungchang zirhona an nei

Aizawl : Aizawl leh a chhehvela Dengue natna hluar mek chungchang-ah State Vector Borne Disease Control Programme (SVBDCP), National Health Mission, Health & Family Welfare Dept. chuan November 13 atanga tanin ni 2 chhung awh ATI Auditorium, MINECO, Khatla, Aizawl ah Aizawl Municipal Corporation (AMC) huamchhunga Local Council 87 atangin member 2 zel kokhawmin Dengue natna chungchanga inzirtirna leh invendan bakah khawtlang te nena Dengue tirem tura thawh ho dan tur sawihona hun an nei a ni.

  Mizoramah kumin Jan 1 atanga Nov 10, 2025 thleng khan Dengue natna exam zat 27950 niin, Dengue natna hmuhchhuah zat chu 1846 a ni, 2025 ah Dengue natna avanga nunna chan 1 an awm tawh bawk. Kumin 2025 a Dengue natna hmuhchhuah zawng zawng atangin AMC area chhunga mi hi 975 niin, za zela 52.82% a ni.

L&E Minister inkhawmpuiah LESDE Minister Lalnghinglova Hmar a tel

Aizawl: November 11, 2025 khan Ni hnih awh ‘National Conference of Labour & Employment and Industry Ministers and Secretaries of State/UT Governments’ chu Bharat Mandapam, New Delhi-ah tan a ni a, Mizoram aiawhin Conference-ah hian Lalnghinglova Hmar, Minister of State, Labour, Employment, Skill Development & Entrepreneurship (LESDE) Department a tel.

  Lalnghinglova Hmar chuan LESDE Department kal tlangin Mizo thalai engemawzat Japan leh ram dangah hnathawk turin an kal tawh tih a tarlang a. Tawng zir tura Delhi pan a ngai thin chu thil hautak tak a nih avangin, Mizoram chhung emaw hmar chhak lamah awng zirna hawng turin rawtna a thlen.

  National Labour Conference hi sawrkar laipui leh state/UT sawrkarte inkara thawhhona tha leh chak zawk a awm theihna’n buatsaih a ni a, MoLE hnuaia hmalakna hrang hrangte chak zawk leh awmze nei zawka kalpui dan tur ngaihtuahho a ni. Conference hi session hrang hrangah then niin, presentation bakah rawtna siam leh sawihona hun hawn zel a ni.

Maumual-a Land pass tihfel tawh 456 semchhuak

Aizawl: November 11, 2025 khan VOLCOMH, Maumual, Chaltlang-ah Revenue Department hmalaknaa Maumual ram teh fel atanga Land Pass 456 semchhuahna hun hman a ni a. Land Revenue & Settlement Department Minister B.Lalchhanzova chu khuallian. 

  Maumual Land Owners, Peace Accord MNF Returnees Association (PAMRA), Local Council hruaitute leh LR&S Department-a thawktute he hunah hian an tel a ni.

  Department tarlan danin Maumual ram teh thah hna hi May ni 23, 2022 atang khan kalpui tan a ni a. Survey nan hian kawng km 11.65-a thui laih niin kawng laihna leh Survey hna thawh nan hian Cheng 41,37,872 hman a ni a. Ram 831 teh that niin Land Pass 456 pek chhuah theih a peihfel a ni a. Land lease 13 leh Land Bank 61 teh fel a ni bawk.

Mizoram Sawrkar in Special Award a dawng

Aizawl: 18th Urban Mobility India (UMI) 2025, November 7- 9, 2025, Gurugram, Haryana a neih ah Mizoram sawrkar chu Mizoram Traffic Management System chungchang ah Special Award hlan a ni a. 

  Lawmman hi Union Hon’ble Minister Manohar Lal leh Union Minister of State Tokhan Sahu, Ministry of Housing and Urban Affairs ten ‘Special Award’ an hlan a. Mizoram sawrkar aiawh in Lalmalsawma Pachuau, Secretary, UD&PA, Jacob Lalawmpuia, Director UD&PA leh Town & Country Planning Officer ten ten an dawng a ni. Urban Mobility India Conference hi Ministry of Housing & Urban Affairs hnuaiah Institute of Urban Transport(India) in kum tin huaihawt thin a ni a.

  He Award hi Mizoram mipui in lungrualna te, thuawihna te, department a thawk tute thawhona bakah Mizoram Traffic Police leh Transport Department hmalakna tha tak avanga he Award a dawng thei hi Mizoram Sawrkar chuan lawmthu a sawi a ni.

Tourism Minister leh NITI Aayog member Dr. VK Paul inkawm

Aizawl: Lalnghinglova Hmar, Minister of State, Tourism Department leh Dr. VK Paul, Member, NITI Aayog te chu November 10, 2025 khan New Delhi-a NITI Aayog Headquarters-ah an inkawm a, Mizoram tourism hmasawnna tur chungchang ngaihtuahin hma lakho dan tur an sawi dun.

  Mizoram tourism hmasawnna'na NITI Aayog leh Mizoram sawrkar hmalakna tur sawiho zingah Mizoram Tourism Conclave buatsaih a tel a. Stakeholder tam zawk an tel theihna tur leh, Mizoramin a hlawkpui theih tura ruahmanna siam nise tih a ni. New Delhi-a 'Mizo Day' hman chungchang sawiho a ni bawk.

  NITI Aayog leh Mizoram sawrkar tangkawp chuan November 24 ah Mizoram sawhthing tharchhuah chungchanga inrawnkhawmna, 'Stakeholder Consultation on Ginger Produce for Mizoram' tih chu New Delhi-ah neih a ni dawn a. He hun hi Mizoram Chief Minister Lalduhoma'n a telpui dawn a ni.

Pesticide Residue Analysis Laboratory hawng

Aizawl: Chief Minister Lalduhoma chuan November 10, 2025 khan College of Veterinary Sciences & Animal Husbandry, Central Agriculture University (Imphal), Selesih din cham kum 27 na lawmna a hmanpui a. He college campus chhunga sak thei leh thlai thianghlim dan endikna Pesticide Residue Analysis Laboratory a hawng nghal.

  Sawrkar laipui chuan thlai hrisel leh thianghlim thar a tulzia hriain kum 1985 khan All India Network Project on Pesticide Residue a din a. Kum 2010 khan hmar chhak biala a awmchhun ni turin Selesih Vety College pawh hi centre pakhatah a pawm a. Kum 2019 khan hmanraw changtlung leh centre puitling a nih theih nan College hian Mizoram sawrkarah RKVY Scheme kaltlangin cheng nuai 1180 lakh man project a thehlut a, sawrkar hian lo pawnsakin hmalak zui nghal a ni a. November 10 khan hawn a ni ta a ni.