ZALEN April 27, 2025 : Sawrkar laipuiin December 7, 2024 atanga India 100-Day TB Elimination Campaign-a kalpui hmalakna kal zelah Tuberculosis (TB) veite enkawlna tur damdawi thar, BPaLM chu July thla velah MDR-TB veite hnenah pek tan theih beisei a ni.

ZALEN-in Health department thawktute hnen atanga thu a dawn danin Multi Drug Resistant TB damdawi thar, BPaLM hi sawrkar laipuiah indent thuai tum a ni tih an sawi a, tun atanga thla hnih hnu velah chuan a lo thlen beisei a ni tih an sawi.

TB damdawi thar, BPaLM chu tuna damdawi aiin a tha zawk tih sawiin, “Tuna damdawi kan pek hi a rei lo berah thla 9-11 inkar an ei ngei ngei a ngai a. BPaLM erawh thla ruk chhung ei niin a damna rate (success rate) pawh a sang zawk a; chuvangin, TB veite pawhin an ei duh zawk dawn a ni,” an ti.

State TB Control thawktute chuan BPaLM chu MDR-TB vei hmuh tharte chauh pek an ni dawn tih sawiin, “Tuna Multi Drug Resistant TB damdawi ei mekte hi chuan an damdawi ei hi an chhunzawm ang a, MDR-TB vei hmuh chhuahte hnenah chuan BPaLM damdawi hi pek a ni dawn a ni,” an ti.

Kumin thla thum chhung kalta (January-March) khan Mizoramah TB vei an awm tih sawiin an zinga 60% vel chu chuap TB niin a dang 40% hi taksa dang (pumpui, ruh, vun, tha be leh thil dang TB an ni a. Inenkawlna damdawi a that tawh bakah department thawktuten an vil ngun avangin a dam an tam tih an sawi.

“Kum 2022 khan TB vei dam zat hi 87% a ni a, kum 2023-ah 88% leh nikumah TB vei zinga 80% enkawl dam an ni a. A damna rate a san chhan hi TB natna vei enkawl thiam a nih tak vang te, thawktuten an umzui peih vang leh damloten damdawi an ei that vang a ni,” an ti a. Zu in nasaah erawh damdawi hian hna a thawh chak loh avangin a damna rate hi a sang lo niin an sawi.

TB leh HIV chu a kalkawp duh tih sawiin thawktute chuan, “Tun dinhmuna kan patient neih 10% vel hi HIV positive an ni a. HIV an kai tawh chuan an taksaa ral dotu sipai kha HIV hrikin a ei chhiat awlsam vangin TB an kai duh hle a, thihpui pawh thahnem tak an awm,” tiin HIV vei damlo thihpui tam ber chu TB a ni tih an sawi bawk.