Aizawl February 8, 2023: Parliament session neih mekah Mizoram Rajya Sabha MP K.Vanlalvena zawhna chhangin Union Minister of Road Transport and Highway Nitin Jairam Gadkari chuan Mizoram hmun hrang hranga NHIDCL hnuaia kawng laih hna thawh mek leh a kaihhnawih thil pawimawh te ziakin chhanna a pe.

Nitin Jairam Gadkari hian Silchar - Aizawl Four Lane laih bul tan mekah Vairengte leh Kolasib inkarah mi 480 hnena compensation pek tawh chu cheng vaibelchhe 281.73 a nih thu a sawi a, Kolasib-Sairang inkar compensation erawh tihfel a la nih loh thu in a chhang.

Union Minister chuan Silchar - Aizawl Four Lane kawng laih tur chu package 8 ah then a nih thu leh package 2 chu Assam NHIDCL kutah dah a ni, a ti a, package 6 chu Mizoram NHIDCL kutah dah a nih thu a sawi. Mizoram chhung package 4 ah hna thawktu tur Contractor thlan fel an ni, tiin, cheng vaibelchhe 2369.35 sanction tawh a ni tih a tarlang a. Kawnpui - Sairang package 2 chu DPR siam mek a ni, a ti bawk.

K. Vanlalvena zawhna ziaka a chhannaah Union Minister chuan Mizoram chhungah Two lane kawngpui thlur 4 laih mek a ni a. Aizawl - Tuipang KM 380 a thui cheng vaibelchhe 7280.95 te; Aizawl - Imphal via Ngopa Two lane road 98.57 KM a sei cheng vaibelchhe 1517.60 te; Seling - Champhai 119.95 KM a thui cheng vaibelchhe 2279.74 te; Lunglei - Tlabung Two lane road 74.95 KM a thui cheng vaibelchhe 1439.03 te chu NHIDCL hnuaiah Contractor hrang hrang ten an thawk mek tih a tarlang bawk a ni.