Aizawl August 9, 2022 : Mizoram Rajya Sabha MP K.Vanlalvena chuan nimin khan India President thar Droupadi Murmu chu a office chamber-ah a hmu a, Mizoram mamawh thenkhat bakah UPSC member leh Governor atana Mizo dah ve turin President hi tawngka leh ziakin a thlen.

K. Vena chuan President hnenah hian, India independence hnu kum 75 na leh Mizoram-in state a hmuhna kum 35 hnuah pawh Mizoram chu India rama ziak leh chhiar thiam percentage sang tak nei tu a ni chungin Union Public Service Commission member pakhat mah Mizote zingah ruat an la nih ngai loh thu lehpost pathum ruak mêk a awm thu te hrilhin he post ruakah hian Mizo pakhat tal dah ve turin India President hnenah hian ziak leh tawngka-in a thlen a. National Commission for Schedule Tribe Chairman post leh member post pawh a ruah mek thu leh heng post ruak te hi Tribal kan nih ve avang pawhin Mizo ten luah ve kan phua a hriat thu  a sawi bawk a ni.

India independence atanga kum 75 ral hnuah pawh Mizo te zinga pakhatmah Governor atana ruat an la awm loh thu K.Vanlalvena chuan India President hnenah hian a thlen bawk a. Chutih laiin kum rei lo te chhungin Governor tam tak Mizoram-ah an rawn dah tawh lawi si chu Mizo mipuite rilruah Governor ngaihhlutna a tih hniam tir thei a ni, a ti.

India President Droupadi chuan K. Vena thu thlen te chu India Prime Minister hnenah thlena sawi pui ngei a tum thu a hrilh a ni. K. Vena hian President hnenah hian Mizo puan a hlân a ni