Zawhna: Ka pu, tleirawl kum 16 mi ka ni a, ka bialpa nen sex kan hmang a, chuta tang chuan ka tai a na ta fo mai a. Sex atanga kai theih natna ka nei ti dawn ila ka bialpa hian hmeichhe dang a la mutpui bawk si lo va, kei pawh ka hman vawi khatna a ni bawk si a. Sex kan hman hmain a na ngai bawk si lo va, eng nge a chhan ni thei ang? Engtia inenkawl chi nge? Min puih theih chuan ka lawm hle ang.

Chhanna: I zawhna hi a pawimawh hle mai a, ka chhanna hi a bikin nu leh pa, fa tleirawl neite tan phei chuan uluk taka chhiar ngei chi a ni ang. A kaihhnawih tam tak a awm a, chhiartute hriat atana pawimawh pawh tar lan ka tum dawn a ni.
    A hmasa berah chuan kum 16 lek i la ni a, kum i la tlin loh avangin nangma duhthu ngeia sex hi hmang pawh ni mah la, India ram danah chuan i bialpa hian a pawngsual che (statutory rape) tihna a ni a, jail a tan phah thei a ni. A chhan chu kum i la tlin loh avangin nangmah hian remtihna (consent) i la pe thiang tlat lo a ni.
    POCSO (Protection of Children from Sexual Offences) Act (Dan) hi naupang kum la tling lote venhimna atana dan pawimawh tak mai a ni a. Chutihrual chuan hetiang case-ah hian thil awmzia hriat chian loh avang leh, hmeichhia kum la tling lote duhthu leh remtihna ngeia lo mutpuite pawh an awm palh thei a, thiam loh an chan theih avangin fimkhur a pawimawh hle. Dan khirh tak mai a ni a, a serious hle a ni. A chunga ka tar lan ang hian hmeichhiain kum 18 a tlin hma chuan sex hman kawngah ama remtihna (consent) hi a pe thei reng reng lo a ni.
    Tleirawlte zinga hma kan lo lak tawhna atangte leh, damlo ka lo en tawhte atangin hmeichhe tleirawl tam ber hian an bialpate thusawi hi an awih nghal tawp zel mai a, hei tak hi a buaithlak hle. An bialpate hian hmeichhe dang kawp emaw, sex lo hmang tawh emaw turah hian an ring phal lo fo a, “Ka la hmang lo,” an tih hi rintlakah an ngai tawp zel emaw ni tih mai tur a ni. Kan hriat tur pawimawh tak mai chu mipa hi an virgin leh virgin loh hriat ngaihna a awm lo. Hmeichhe tam tak pawh lo kawp teuh tawh mah se virgin anga an insawi miau chuan an virgin lo a ni tih proof theihna a awm tlat lo.
    Chutiang avang tak chuan hmeichhe tleirawl/nula zingah sex atanga inkaitheih natna, Sexually Transmitted Infections (STI) kai an awm phah fo a ni. STI tam tak hi chu a enkawl dam theih a; mahse, pawi ta zawk chu HIV an lo kai palh hian a ni. Hepatitis B leh C te pawh sex atanga kai an awm zauh zauh bawk. STI hi insawiselna nei lem lova kai an awm fo mai a, HIV leh Hepatitis B/C te phei chu an thawm a zawi hle.
    I zawhna hi han thlur bing ta ila. Nang ang rual tai na hi thi neih nen a inzawm thei a, natna hrik kai vang ni chuang lovin tai na hi chu thi neih fel lo eng emaw vang ber te, phing lawng te, hrik hmuh tur awm lo mah se chhul leh a bul bawr vung (pelvic inflammatory disease) te pawh a ni thei bawk. Sex in hman hnua tai na nei ta nia i insawi avang hian STI eng emaw ber i nei a ni thei a; chuvangin, investigation - Zun test leh Ultrasound te lo tihtir ta la. Zunkawng lam infection (UTI) i nei a nih chuan i zun test-ah hian a lang ang a (normal result erawh a awm thei); tin, chhul leh chibawm vel fel lo eng emaw tak i neih leh neih loh hriat nan Ultrasound hi a pawimawh bawk.
    STI i neih leh neih loh hriat hi a pawimawh hle. Blood test – VDRL leh HIV test te pawh ti tel thei ngei la duhthusam a ni. I lo nei a nih chuan enkawlna i dawn thuai a pawimawh ang. STI-ah hian swab test/culture te pawh tih tel a tul thei bawk. Heng test result-te hi hriat phawt loh chuan inenkawl dan hrilh che a har deuh. A tha berah chuan doctor mumal deuh takin lo inentir ngei la, an check che atangin test tul turte pawh an hrilh hre thei ang che. Damdawi erawh mahni thu emaw, thiante/hmelhriatte chawh (medical mi ni lo) emaw ei ngawt erawh tih loh nise.