ZALEN June 11, 2026 : Vawiinah khan Mizoram State Legal Services Authority (MSLSA) buatsaihin, Green Mizoram Day pualin MINECO, Khatla-ah thing phun uar a tulzia inzirtirna leh thing phun na hun hman a ni. Kumin thupui hi “Thing hi rangkachak anga hlu, Nunna tinreng bul a ni” tih a ni.

He hunah hian Gauhati High Court Chief Justice, Justice Ashutosh Kumar chu khuallian a ni a, High Court Judge pahnih—Justice Michael Zothankhuma leh Justice Sanjeev Kumar Sharma ten an hmanpui. Chief Justice hian High Court Office bulah Herhse tiak a phun nghal a, official dang ten thingtiak an phun bawk a ni.

Chief Justice chuan kum 1999 atanga Green Mizoram Day hman tan a nih hnuah thingtiak nuai 46 chuang phun a nih tawh thu sawiin, boruak thianghlim leh tui min petu thing leh mau, ramngaw leh nungchate humhalh tlat a tul thu a sawi.

He programme hi Vincent Lalrokima, MJS (Member Secretary, MSLSA)-in a kaihruai a, Mizoram Judicial Officer, Law Department Officer, Gauhati High court, Aizawl Bench Officer, Mizoram Bar Association Member leh Law College Zirlaite an tel a ni. MSLSA staff-te hian Ainawn vengah pawh thingtiak engemaw zat an phun nghal bawk a ni.