Aizawl: Mizoram Pradesh Congress Committee President Lalsawta chuan, "Ka ta a ni lo tih chul ngai khawpa sum ngah nih hi ka tum ve lo," a ti.

Nimin tlai tlai dar 3:30 khan Serchhip-ah vantlang inkhawm buatsaihah MPCC President Lalsawta chuan, "Mizo mipuite hi keimahni leh keimahni kan inchhanchhuah a ngai a, eng ram mahin min chhanchhuak dawn lo. Kei chuan   hi ka tlangaupui a ni. Kan thalaite hian keini puitling tawhte, upa zawkte ai hian ram an vei zawk daih a, dikna pawh an duh zawk. Chu chu Mizoram siamtha tura beiseina ka neih chhan a ni," a ti. 

Lalsawta chuan, "Politics hi a tha zawnga kan her dik a ngai a. Burma ram nasa taka an buai chhante, indona avanga Ukraine buai em em chhan pawh khu Politics vek a ni. Chuvangin, politics-ah hian ka tel ve lo ti ringawt lovin, siamthat tumin theihtawp i chhuah ang u, Politics tha lo hian kan zavaiin min hrut vek tho a ni. Politics hmangin sorkar tha hi i siam ang u. Chutiang tur chuan mitinte thawhpuiah ka sawm che u a ni," a ti.

MPCC Vice President Lal Thanzara pawhin thu sawiin, "Lalsawta kaihhruaina hnuaiah hian sorkar tha zawk siam kan tum a. Chief Minister tha neih duh apiangte chu Congress lo thlawp leh hram turin ka ngen che u a ni. Nasa taka danglam hi kan tum a. Congress Party-in Mizoram tana hmasawnna nasa tak a lo thlen tawh thinte aia nasa zawk thlen tir hi kan tum a ni," a ti.

MPCC Treasurer Zodintluanga pawhin, "MNF sorkarna hnuaiah chuan Mizoram Budget hian loneitute hnen a thleng phak lo a, MNF sorkar kum 4 chhung hian loneituten engmah an la dawng lo a, Kamrula te, Abu Majumdar-a te hnen a thleng daih. SEDP hnuaiah Bekang leh Telhawng hmanga intodelh tir min tum a, hma an la mek. Chutih laiin Assembly zawhnaah SEDP hnuaia tanpuina pek turah trade thlan fel a la nih loh thu an sawi leh lawi si. SEDP hi eng ber hi nge tih pawh hriatthiam har tak a ni ta. Kum 4 chhunga SEDP sem dan tur engmah ruahmanna a la awm lo hi Mizoram mipuite zah lohna dik tak a ni," a ti.

Congress-in Mizoram chhim lam tlawh a 'Chhim hrut fehchhuah' hun a hman  chu zawh fel a ni a. Nimin zing-ah Hnahthial Bazarah vantlang inkhawm buatsaih a ni a, Hnahthial leh Serchhip inkar khuate tlawh zelin, nimin khan vantlang inkhawm Serchhip-ah neiin an fehchhuah an zo a ni.