Aizawla veng tam zawk tan Gas hi a harsa kumtluan a tih theih. Kan nitin mahmawh, zing, chhun, tlai leh zanah a tel lovin a awm theih loh tluk a ni a, khawpuia cheng chhungkaw tin hian gas kan tih mai, Liquefied petroleum gas (LPG) hi hnianghnar tak hi chuan kan hmu lo tih a chiang, gas chang zingah sorkar hnathawk lian leh mi langsar tak tak hmuh tur an awm thin hi a nemnghetna tha tak a tling. Kan khawpui-ah hian veng chhunga gas ti thleng tam thei hi Local Council chak tehna pawh a ni tlat tawh.

Hetiang khawpa gas lak a harsat lai, thla khatah bur khat pawh agent atanga lak tur a awm loh lai hian, ka thian pa chu a vanduai a, a gas bur leh regulator a inmil thei lo a, vuah ngaihna a awm lo. Gas kan lak zinga a tam zawk hi Aizawl-ah chuan khawih chingpen-ah kan ngai hmiah tawh a, buk tling lo mah se, kan pawm tawh. Gas sem chhuah kan lak dawnin veng tam takah bottle-a tui ken lawk chu tih phungah an nei tawh ; a leak leh leak loh enna atan.

Gas la tur ten an gas lak tur hi a lo leak chuan a dang an la leh mai thin a, heng a leak te hi pliers hmawr zum chi hmanga siam that leh te an ni thin a, gas indaih lohna a nasat em avangin veng chhunga Local Council card nei lo tan chuan iai ngawt theih a ni lo a, chin hriat loh black-a lei ngawt ai chuan aman hla zawk thin tho avangin an lak loh phah chuang lo.

Gas khawih chingpen leak lem lo leh lakna hmuna siam chawp te hi chu thuhran ni se, ka thianpa gas lak erawh regulator nen a inrem thei lo a, hman ngaihna a awm lo. He gas a lak hi a bur pawh a thar fu a, an lak dawn hian a leak leh leak loh pawh cylinder valve atangin an en thlap, mahse, hman an tum chuan a cylinder valve leh regulator a inmil thei tlat lo a, chiang tak kan en hnu chuan na taka chhut chawrh ang maiin a hmawr hi a lo sawi deuh bui a, inmil ngaihna a awm lo. Eng angin nge gas bur hian sawisak a tawh tih hi hriat chian a chakawm ngawt mai.

LPG hi tunah rih chuan rawngbawlna atana hman boruak chhia pe chhuak lo bera kan neih niin ram chhungah hian mi 17,00,00,000 velin an hmang ang chhut a ni a, India ram chhungkua 60% velin an hmang ang a ni. Sawrkar laipui chuan ram pumah LPG la hi chhungkua 75% tal tlin ngei turin hma a la mek a, ram pumah LPG semtu (distributor) hi 17,000 chuang an awm a, khawpui leh thing tlang lamah an inzarpharh. Ministry of Petroleum and Natural Gas, Central lam chuan khawpui-ah LPG hi sem chhuah belh a tul tihna a nei lian hle a, hriselna leh kan chheh leh vel ngaihtuahna vang a ni ber.