ZALEN February 10, 2025 : ZPM General Headquarter chuan Party office ah vawiin khan chhung inkhawm kan hmang a, Chhung inkhawm thusawitu Sport Minister Lalnghinglova Hmar chuan, Kal phung thar mipui sawrkarin Zoram tha zawk a thlen ngei dawn tih a sawi. VC leh LC inthlanah sawrkar bawm zawnho pui thei tur thlang turin mipui a sawm.

Lalnghinglova Hmar chuan, "Mizoramah kalphung thar a takin kan hmu mek a, chu kal phung lo thar mek chuan Mizoram tha zawk a thlen ngei dawn a, kan rama thil nihphung pangngaia kan lo neih tawh, dan kalh tih pawh kan hriat mang loh aikal lakte kan titawp ngam a, hei hian chhungkaw thenkhat tan nghawng nei deuh mah se dan anga kala siam that hna thawh phawt mai hi kan hotuten tha an ti a, kalphung tharin kan kal mek a ni."

"Minister-te hamthatna nasa takin kan ti hniam a, sawrkar hmasa hunlaia an lirtheite chu tun thlengin kan la chhawm a ni. Minister-te'n official car leh a chhawm tel support car chiah kan kawl a, intiropui bung bung kher lovin a kal theih tih a lang a ni. Ruang phurhna tura cheng nuai 23 pek chhuah te hi kalphung thar a ni a, a hun taka office kal leh haw a ni ta chu thil lawmawm tak a ni," a ti bawk.

LESDE minister chuan, "Mizoram sawrkarin kum upa, rualbanlo leh hmeithai tanpuina sum a tipung a, state sawrkar-in Rs 100 a pek thin chu Rs 1,000-ah tihpun a ni a, budget-ah sum dah a ni bawk. Sawrkar hnathawk pension sum tâng reng thin chu pensioner-te hma ngaiin theih ang angin pek chhuah zel a ni a, ZPM sawrkar hnuah Pension and Other Retirement Benefits atan cheng vaibelchhe 1278.94 pek chhuah a ni tawh a, hei hi kalphung thar chu a ni."

"Electric bill pek kawngah kalphung thar kan hmamg chho zel a. kum 2019-24 inkarah electric bill pek tlai avangin Mizoram sawrkarin cheng nuai 2,203 a chawi belh a; ZPM-in sawrkarna a chan hnuah a hun taka electric bill pek a nih avangin cheng nuai 100 pawisa kan dawng ta a ni. Tun hmaa kan chawinaah kalphung a thar meuh chuan kan dawn belh ta a ni," a ti.

Excise Minister chuan, "Politician ang ni lovin mimal rilru in sawi ta i la, zu in lo thei lote in tur zu chhe lutuk hian ngaihtuahna thar min pe teh se. Tun hnaiah Mizoramah zu in mi an thi nasa hle mai, a in lo thei lote dinhmun hi huaisen taka ngaihtuah ngam tul a tawh niin a lang. Hetihlai hian sawrkarin zu leh ruihhlo lakah beihpui kan thlak zel bawk a, Vaivakawna 'a senchi lane' tih chu 'venbuk lane' tia thlakin khawtlang nen tang ruala zu hmunpui tihrem a ni tawh a ni a, hei hian sawrkar hmalakna thawhpuiho thei khawtlang hruaitu neih pawimawhzia a ti langin ka hria a. Naktip maia Village Council leh Local Council inthlanah pawh Sawrkar nena hmasawnna bawm zawn ho thei tur mipuiten i vote ang u," a ti bawk.