Kan buainaah hian Muslim pawl, IPF an inrawlh : Assam CM

Admin - Sep 25, 2021

Islamist pawl kal firfiak tak, PFI chu an inrawlh niin CM hian a sawi

India ram puma sawi hlawh tak, kar hmasaa Assam-a Darrang district-a tharum thawhna thlengah khan Islamist pawl kal firfiak tak, Popular Front of India (PFI) chu an inrawlh niin Chief Minister Himanta Biswa Sarma chuan Inrinni khan a sawi.

Chi inbeihna lam thil engmah a awm lo niin a sawi bawk.

Ningani khan Darrang district-ah hian sorkar ram luahtute hnawh chhuah tuma thawk chhuak police leh a luahtute hi nasa takin an inbei a. Mi pahnih an thi a, pakhat hi kum 12 mi chauh niin police silai hmeh puaha thi a ni a. Hliam tuar mi 15 vel zinga pakua chu police an ni.

Video darh pakhatah chuan mi pakhat, tiang kengin riot gear nena inthuam police chu panin an lo kap a, a tluk hnuah pawh kut an thlak zui bawk.

“State sorkar chuan heng hmun luahtute hnenah hian thla rei vak lo liam ta chhung khan PFI hian Rs. nuai 28 zet an khawn tih finfiahna chiang tak kan nei a, sorkarin hnawh chhuah a tum pawh dodal turin an hmin a. An hming pawh kan nei a, min dodal thei lo vang, mipui fuih pawrhin buaina an siam a, inrawlh paruk hming kan nei,” tiin Chief Minister Sarma hian thuthar lakhawmtute a hrilh.

“Buaina chhuah niah khan hnawh chhuah tur chhungkaw tan ei tur pawh ken a ni a, PFI hian an lo tlawh hmasa a, finfiahna kan neihah chuan college lecturer pawh a tel a, kan chhui zui mek a. Assam sokar chuan PFI hi ban (khap) tura ngenna lehkha leh tul kan thawn tawh,” a ti.

State sorkar chuan thil thleng kha Gauhati High Court judge hlui kaihhruaina hnuaiah chhui tura tih a nih thu leh a hming erawh la puan loh a ni.

Darrang district thuneitute hian sorkar lam, hectare 600 chuanga zauva chengte chu Thawhtanni atang khan hnawh chhuakin chhungkaw 800 chuang an ni tawh a. Sipajhar-ah phei chuan sakhaw biakna hmun pali lai an tichhe tawh.

“Chhungkaw 60 chauh hnawh chhuah an la ni a, engati nge mi sang chuang an lo kalkhawm theih?” tiin Sarma chuan a zawt bawk.

Sarma chuan eptu leh an state-a hnam tlem zawk aiawhte pawh a hmun ngeia hruai a tiam a, anni hi  hetiang thil thlenna tura mi fuihtu an nih thu a sawi a. Chanchinbute pawh thil thleng bul leh bal chhuah tha duh lovah a puh bawk.

“A video kan hmu a, duh lotute khan suahdur nen an bei hmasa a, kan bei let mai duh lo va. A video clip thenkhat chauh en lovin a pum pui thlirin engkim a lang a ni,” a ti.

“Police 27 chauh khan mi sang chuangin an hual a. Police-ten Muslim pahnih khat an hliam a, chu chu chi leh sakhaw bila inbeihna a ni lo. Engati nge chanchinbute hian chutiangzawnga an chhuah tlat si?” a ti.

Share now