Aizawl: MNF Adviser leh Health Minister ni bawk Dr. R.Lalthang- liana chuan, "Kan candidate hi lo vote ula, inthlan leh atan pawh in zawngchhang ngei ngei ang," a ti.

Nimin khan Tuirial bial bye election campaign a fehchhuahna ah he thu hi sawiin Dr. R.Lalthangliana chuan Thingdawl, Bualpui, Kawnpui, Khamrang leh Mualkhang te a tlawh a. Health Minister Dr.Thangtea chuan, "Khawvel, India leh Mizoramin kum hnih zet kan buaipui lai mek Covid chungchang hi tun tum hian ka sawi tel ve hram lo thei lo a. Covid avanga thi pawh Mizoramah kan pung ve zel a, a pawi kan ti tak zet a ni. Mizoramah chuan contact tracing lamahte kan hmalakna a tha a, a vei pawh kan inhmu tam hle thin a. Mahse, thawk tha tia fakna pawh kan dawng ve nasa a ni," a ti a. Covid do kawngah sawrkar, Kohhran hrang hrang, NGO hrang hrang, Political Party hrang hrang leh mimal tin te thawhhona a tha tih sawiin, "Tuna Covid vanga thi mi 380 vel kan neih zingah hian 80% hi natna benvawn leh natna khirhkhan nei sa vek an ni a. Kan chhungkuaah hetiang natna nei sa leh kum upa lam kan awm a nih chuan i fimkhurpui hle ang u. Chu chu kan him tlanna tur a ni," a ti. Tuirial bialah Party thenkhat campaign auhla ah Health Care chhungkaw khat tan cheng nuai hnih ni thin, cheng nuai khatah a tlahniam tawh em ni, tia zawhna chu Dr.Thangtea chuan a la pangngai reng a, cheng nuai hnih a la ni reng e, tiin a chhang.

Dr. Thangtea chuan, "Kan tlin lohna bial Serchhipah khan ka Department Health-ah pawh Oxygen Plan lianpui Prime Minister nen inthlunzawmin ka hawng a, Commerce-ah pawh Market lian tak an sa zo a, Department dangah pawh hma kan la mar reng tho a, hman ni lawkah kan Chief Minister zahawm tak pawhin District danga awm lo, Paragliding chu Serchhip-ah a hawng tawh bawk a, a pangngaiin a la kal reng. Chuvangin, mi thenkhatten 'Serchhipah pawh an tiam ang an ti lo' an lo tihfo hi thudiklo a ni," a ti a. "Tuirial biala party dang Candidate-te hi an tha lo e kan ti lo. Mahse, Politics-ah hian ruling nih hlutna hi a awm ve a, Tuirial bial hi ruling bial lo ni ve tawh turin min lo chhin ang che u, a hlut bikna in hmuh ngei ka ring a ni. Kan candidate hi in tihtlin chuan, inthlanpui lo awm leh turah pawh in titling leh duh nghal ngei ang a, in zawng chhang ngei ngei ang," a ti bawk a. SEDP chungchang sawiin, "Kum hnih tha hun kan la nei a, Covid hi kiam zel turah ngai ila, a lo la awm deuh a nih pawhin a hma ang em em khan pawisa hmanna tur a awm tawh lo ang a, Budget hmasaa SEDP kan dah kha chu beisei lawk hauh loh Covid-ah hman a ngai a, Budget tharah hi chuan kan Chief Minister zahawm takte nen pawh kan sawi tawh a, pawisa kan dah ang a, hma kan la thei tak tak tawh dawn a ni," Dr.Thangtea chuan a ti bawk.