Aizawl August 26, 2024 : Vawiin khan Mizo Hnam Run inkhawmah Ramthanmawia (Papuia), MLA chuan Mizoram Assembly ni hnih awh session neih zawh tak chungchang a sawi a, "Thla 8 sawrkar hi Zoram mipuiin an hre tan mek a. Pawn lam atanga an insawi ang ngawt a ni lo tih chu anmahni ngei pawhin an inhre chho mek," a ti.

Papuia chuan, “Assam Rifles chungchangah CM-in AR leh Mizoram sawrkarin MoU hran ve ve an ziak angin House-ah a sawi a. RTI chhanna erawh AR-in MoU an duang a, Mizoram sawrkarin a lo endik tih a ni. CM-in ka thusawi a dik zawk a tite kha RTI zahawmna tihbawrhbanna a ni.”

"Kan minister-te an inzir peih lo. Anmahni flagship program chungchang zawh belhna pawh an chhang hlei thei lo," a ti.

East Tuipui bialtu MLA chuan, "I-Day khan CM chuan electric power man ba kan pe tla vek tawh a, rebate Rs vbc 35 chuang kan hmu let zawk, a tih kha Assembly session-a ka zawhna chhanna chu 'Electric bill ba Rs. vbc 134.90 a awm,"' tih a ni.

"Sasci Rs vbc 500 min lo pe tawh a tih pawh, ka zawhna chhanna chu - August 14 thleng khan release order kan la dawng lo tih a ni. Kan CM hian thudik tawk lo hi a thudik sawi hmiah hmiah thin," a ti.

"MNF sawrkar laia covid vanga sum puk sawiseltute khan tunah hian (August 20, 2024 thleng khan) Rs vbc. 2046.19 an puk tawh a. Chhiah pawh an tipung zel dawn a, mipuite min hrek chho dawn a ni. Healthcare-te hi a hmaa kan kalpui tho kha a hming thlakin MNF sawrkarin a lo sual chhuah ADB loan project Rs vbc 1000 chu an nghak tawp a ni,” Papuia chuan a ti bawk.

Thusawitu dang MNF Headquarter GS Dr. L. Thangmawia, Ex-MLA chuan ZPM sawrkar hi kum chanve awrh chauh an la kal a, hetiang em ema insawifiah nasa sawrkar hi a awm ka la hre ngai lo, a ti.

“An sawrkar tirh khan chief minister-in minister-te dept enkawl dan tur road map kan nei vek a, kan policy duan tawhsa angin an kal ang, a ti a. Amaherawhchu tun thlengin mipuiin an road map kan la hmu lo. An sawi loh ang zelin an kal,” a ti bawk.