ZALEN March 5, 2025; Chief minister Laduhoma'n leilung piantirh ata tun ang hian tuman kuthnathawktute an la ngaihsak ngai lo tih sawiin, "Kan danglam reng tawh," a ti.

Vawiin (5.3.24) assembly budget session zawhna leh chhanna hun-ah he thu hi sawiin, chief minister chuan, kum rei tak kal tawh atangin an sawrkar ve a nih chuan sawhthing an lei ang tih an au pui thin tih sawiin, "Ziak leh tawngkam pawhin in kawtkaiah kan lei ang tih hi kan sawi ngai lo ang, tu sawrkar mahin an tlin kan ring lo," a ti a, "Kan sawi thin dan chu colection centre kan siam ang a, chutah chuan sawrkar rate angin kan leisak ang che u tih a ni," a ti bawk.

"Kan intiam angin vawiinah hian kan kal a, kan intiam loh primary collection centre leh secondary collection centre inkar phurh man chu sawrkarin a pe thei lo a, pek sen ngaihna pawh a awm lo," ti a sawiin, sawhthing leikhawmna atan a sawrkar senso a san thu leh, godown leh secondary collection centre te a khah tawh thu a sawi.

Sawhthing an lei sa te chu hralh thawl a nih phawt loh chuan a dahna an nei tawh lo tih sawi bawkin, chief minister chuan, a tahtawla an lei dawn thu a sawi. "Kan farmer te a chawh lo hmanhmawh lo turin kan chah a, mahse farmer te an hmanhmawh a, kan inhnar thei lo, tichuan tunah hian kan khat ta a ni, a dah na kan nei tawh si loh avangin tlemin i chawl ang, inhralh thawl phawt ang kan ti a, dahna a ruah ve leh kan la leh zel dawn a, kumin a thar zawng zawng chu kan lei vek dawn a, kan sen so a tlem emaw a tam emaw kan ngaituah lo," a ti bawk.