Aizawl August 1, 2022 : Mizo Hnam Runah chhung Inkhawm vawiina neihah Home Minister Lalchamliana, MNF Adviser ni bawk chuan, "Vawiina kan hotute archuk tui lo khawpa sawisatu te hi kan dinhmunah han ding ve ta se la eng ruai an nih bik hi ka ring lo," a ti. 

Lalchamlian chuan tunlai sawrkar sum dinhmun sawiin, "Mithenkhat ten kan CM chu Finance Management a thiam loh vangah an puh a, mahse sum leh pai enkawl thiam loh vang a ni lova, kan budget-ah vaibelchhe singkhat sanghnih zahnih sawmkua hi House-ah ban pharin kan pass a ni a, State own tax leh non tax revenue atangin kum khat-ah za a sawm velin kan pha lo a, State thenkhat chu za a sawmruk deuh thawin an intodelh a, keini-ah chuan hailuhna tur kan nei ve lova, Central-ah kan la inghat nasa a ni," a ti. 

Home minister chuan, "Engvangin nge Central-in sum min pek a tih hniam tial tial chhan hi? Mahni intodelh ve turin min duh a nih ka ring. Khawvel pumah Covid avanga kan harsat lai hian tumah hian Financial Management an thiam ka ring lo a, a leh lamah sawrkar hnathawk hlawh leh DA te a lo pung zel a, Finance Commission min pek hi tisang leh thei tur chuang an awm lo a. Chuvangin, kan sum leh pai dinhmun hi mahni phak tawk theuhin i zir chiang ang u. Vawiin ni a kan hotute archuk tui lo khawpa sawisa tute hi kan dinhmunah han ding ve ta sela engruai an nih bik hi ka ring lo," a ti.

Chama chuan, Tax Devolution hi India sawrkarin tax a lak khawm hi tehna fung hrang hrang atangin 0.50 (Duli) vel kan lo chang ve a, thlakhatah vaibelchhe 50 share nei thin kha Covid avangin a tlahniam ta duai duai a ni, a ti bawk.

Home minister chuan, "Tun hma chuan RBI-ah Mizoram hian account neiin State-in a sum kan hmuh hrang hrang kha a lut khawm thin a, kha khan sum kan hmuhna hrang hrangah min chhan a, tunah chuan khang kha a awm tawh loh avangin kan buai ta deuh thin. Amaherawhchu, kan thatna tur a nih te pawh ka ring," a ti. 

Finance Minister hlui Lalsawta chungchang sawiin, Lalchamliana chuan, "14th Finance Commission khan State-ah hian pawisa an pe tha em em a, Congress sawrkar lai khan Pu Sawta kha finance a thiam an ti a. Mahse, a hunlaia a hmuh ang pawisa kha hmu ve ta ila tupawhin an thiam ang," a ti.

Home minister chuan, Political party hruaitute leh mipui pawh hian kan rilru kan thlak a hun tawh tiin, "UT kan nih aṭanga State kan nih thleng hian Central-in min tum sak a la ni a, sorkarin tui/electric bill a han tisang deuh a opposition hoin inti tha fahranin an thlavang an han hauh a. Income tax te hi tlang mite tih loh chuan an pe a, keiniah chuan tribal kan nih avangin Mizoram chhungah kan pe lova, phailama awm chuan an pe ang. Chuvangin, tupawh lo sawrkar sela, politics a inbeihnan kan lo hmang thin hi i sim ang u. Keimahni leh keimahni inchawm zo turin pen khat te te a kan kal a ngai a, central sum ring lo hian kan awm vat ka ring a ni," a ti.