ZALEN February 27, 2025 : MNF President Zoramthanga chuan February ni 25-27 chhung hian Champhai, Samthang leh Khawzawl khua te a tlawh a. Heng huna a thusawinaah hian an elpui awmchhun chu ZPM chauh a nih tawh thu a sawi.

MNF President chuan, "Tunhmaa MNF-in kan ngam loh lian ber chu Mizo Union an ni a. Mahse, an ral vek tawh. A hnua kan ngam loh thin chu PC Party a ni leh a, tunah chuan an ral leh tawh. Congress pawh er tham an awm tawh lo, anni hi Central (Delhi)-a innghat an ni a, khulam an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni leh tawh," a ti.

Zoramthanga chuan, "Kum 2023 inthlanpuiah engati nge MNF kan tlak? Engati nge ZPM an chak viau kan ti a. Hei hi, Pathianin tum a neih vang a ni tih hi kan pawm a ngai a. Chu chu kan intawng thlamuanna emaw, kan inhnemna tawngkam a ni lo. ZPM hi Pathianin Sawrkar tir a duh chhan hi kan ngaihtuah zawk tur a ni. ZPM chu Tiau vut chunga In sa, Chirhdiak chunga In sa ang lek an nihna zawng zawng kan hrechiang tur a ni," a ti.

MNF President chuan, "Kalphung thar an ti a, Mahse, kum khat chhung lek an sawrkarah pawh thil mak leh mipui beidawnna, sawrkara la thleng ngai lo leh tih ngai loh a thleng tam em em!. Heng zawng zawng hi chung lamin ZPM nihphung dik tak mipuite hriatchian tir min tumna hmanrua a ni. Engkim zir lawk leh hrechiang sa, 'research base'-in kan kal dawn, an ti a. Sawhthing lei dan atang ringawt pawhin, an hotupa ber a mangang nghal a, inkhualtelem sawrkar an nih dan zawng zawng kan hmu fiah chho zel a, îtawm bera insawi kha a letling thawk an nih zia kan hmuchiang zel dawn a ni," a ti.

"Village Council leh Local Council inthlanah reng reng, Congress sawrkar leh MNF sawrkar kan chak vung vanglai chuan VC/LC kan la fai deuh vek zel a. ZPM ah chuan an phur ber laiin thla 6 zetin inthlan an sawn hma a, chuti chung pawhin ruling laia che chhe ber sawrkar an ni, a ti. Kal ngaihna an hriat loh luatah Zu zawrh nge, BJP zawm tur..? tih hi an bûk vel mai mai a ni ber tawh a. Heng hian MNF lo chu he ram tana ding chang leh tur a awm lohzia a entir a ni. Pathianin a chanchintha hril a, puang chhuak tur leh he rama rorel leh tur hian MNF hi a hun takah min la chhuak leh dawn a ni," Zoramthanga chuan a ti bawk.