July 20, 2023; "Kan farnu, tihduhna tinreng tuar a, a rapthlak thei ang bera sawisak tawkte thisen authawm chuan, zalenna sual a, nunna chan huamtu martar-te thisenin a bual tawh MNF thinlung a ti rum takzet," MNF party chuan an ti. 

Vawiin khan thuthar thehdarhtute kawmin, MNF party a media & publicity GS VL Krosshnehzova chuan, Manipur a kan unau pawisawilo, Mizo hmeichhe pahnihte chunga rawng taka Meitei ho chetna chu paidam mai chiah an ngai lo tih a sawi a, "Saruaka kawng zawh pui a, pawngsual rawn a, sawisa zuiin, an nunna hial an lak sak kha a rawng kan ti a. Ramsa ang maia insawisakna a thleng hi a mak kan tiin a na kan ti a. Atawp thlengin kan unaute thlavang hauh nan hian MNF chu a pen dawn a ni," a ti.

He thil rapthlak tak kan farmuten an tuar hi MNF chuan a dem takzet tih sawi bawkin, mawhphurtu chhuichhuah leh hrem kawngah Manipur sawrkar, N. Biren Singha kaihruai leh central sawrkar chu chak taka hma la a, an tih tur ti nghal tura ngenin a hriattir nghal a. An tih tur an ti thei lo a nih chuan kan farnute thisen min auhna chhang tur hian MNF chuan hmalak nghal a inpeih reng niin a sawi.

"Kristiante Biak In sawisa a, hal ral a, nunau pawisawilo te nen lam chunga Meitei mipui rawva taka chettirtu N. Biren Singha chu a mawhphurhna hre lo, India Dan palzut a, hnambil politics, Dictator taka kalpui mektuah MNF chuan a ngai a ni. Manipur sawrkar leh central sawrkar chu a state chhung buaina titawp a, chingfel nghal thuai turin a phut nawn leh a ni," a ti bawk.