July 25, 2023; Central YMA leh All NGO CC chairman, R. Lalngheta chuan, "Sawrkar in Manipur a kan unaute buaina hi a chinfel thuai theih nan inpumkhatna tha tak nen tangrual ila, kan hnenah kan Pathian a awm a, anin min hruai anga hnehna kan chang ngei ang tih hi i ring tlat ang u," a ti.

Manipur Zohnahthlakte thlavang hauhna kawng zawh vawiin a neihah thusawiin, R. Lalngheta chuan, "Manipur kan unaute tawrhna chu a rapthlak a, a pawi kan tiin Mizo zawng zawngte kan rilru a na takzet a, kan thinlung a rum a ni," a ti.

"Manipur sawrkar ten kan unaute a venghim zo lo a, an in leh lo leh an Biak In te halsaka nunna tam takin a tuar te, hmeichhe pawisawilo saruaka sawisak a thah zui anni te hi hriatthiam har kan ti takzet a ni," ti bawkin, "Mizo mipuiten enliam harsa kan ti a, kan hachang kan thial mek a, India Sawrkar hian a rang thei ang ber a he buaina hi a chinfel kan phut takzet a ni," a ti bawk.

"Vawiin ah hian India sawrkar hian a khua leh tui te ngei sahimna zawnga Mizorama raltlante tanpuina tur sum, Mizoram sawrkar a la pelo hi hriatthiam har kan ti a, inthliar hranna awmlo a kan unau in leh lo kangral vek hak lai nen a Mizoram rawn raltlante tanpuina tur hi a rang thei ang ber a pe ngei turin kan phut tlat a ni," R. Lalngheta chuan a ti bawk.

Vawiina NGO Coordination Committee huaihawta thlavang hauhna Resolution : 

1. Manipur ah remna leh muanna a awm theihnan India sawrkarin chak takin hma la rawh se
2. Democracy zahawmna tundin anih theih nan sawrkar laipuiin a mawhphurhna hlen thuai rawh ae
3. Manipur buaina avanga in leh lo chan te, nunna chan te leh hliam tuarte zangnadawmna pek ni rawh se
4. Zo hnahthlak nula pahnih an zahawmna ti bawrhbanga, saruaka khawlai fanpui leh pawngsualtu te lakah an phu tawk hremna pek ni rawh se.
5. Manipur buaina avanga Biren Sign-a Sawrkar in Zohnahthlak te thu buai a siam sak leh Jail tang zawng zawng hi chhuah vật ni rawh se.