Aizawl January 5, 2022: Peoples Conference Pary President Vanlalruata chuan ram hruaitu hmasa ten ram laklet tuma hmalak tumna chu remna zawn lai a nih avanga, 'Kan sa lu hawn tur min chuhpui' tia invauna a awm avanga laklet ni lo angin a sawi. 

Ruata chuan tun hma lam khan ram hruaitu ten he ram laklet tuma an lo beih tawh dan sawiin, “Kan ram hruaitu hmasa Pu HK Bawihchhuaka te leh Pu Thena te khan laklet an lo tum tawh a; Assam pawhin tan ngaihna an hre lo a. Rambuaia kan tlukluh avang leh inremna zawn laia ‘Kan sa lu hawn tur min chuhpui’ tia invauna avangin laklet a ni lo a. A pawi tak zet a. A hnua kan ram hruaitu ten hemi chungchanga awmze neia hma an la lo hi an demawm tak zet a ni,” a ti

PC party President chuan Assam Chief Minister in ram zau tak min chhuh sak anga a sawi chu na a tih thu te, Mizoram sorkar hruaitu ten hma an la tha ngam lo chu pawi a tih thu leh thangthar ten an dem tur a khawngaih lawk thu a sawi. Ruata chuan, “Innerline Reserved Forest, hectare 1,31,831 (509 square mile) a zau hi a pumin kan ta a ni a. Chutihlaiin tunah hian Assam-in hectare 74,831 vela zau a luah mek a ni,” a ti. 

Vanlalruata chuan, “Kum tawp lamah Inthlanpui kan hmachhawn dawn niin a lang a. He inthlanah hian kan ram pawh humhalh ngam lo leh Assam in kan ram a luah pawh laklet tum ngam lo chu ram hruai tlak an ni lo tih mipuiin kan hriat ka duh a. Kan ram leh hnam tana ngaihtuahna tak tak hman kumah kumin hi i hmang ang u,” tiin mipui a sawm a ni.