Aizawl: Rural Development Minister Lalruatkima chuan, “Kohhran leh tlawmngai pawl hrang hrangten an tawiawm that avang leh sawrkar thu leh hla leh tih tur leh tih lo tur te mipuiin an zawm that avangin Mizoram chu state mal khaia COVID-19 positive neih tlemna ber leh COVID-19 avanga boral tlem ber state a ni thei a, kan zavaia thawhhona rah a ni,” a ti.

RD Secretariat-a thawkten Zirtawpni kaltaa inhlan tharna an neih a hmanpuina ah he thu hi sawiin Rural Development Minister Lalruatkima chuan, “COVID-19 vangin nikumah mitin rilru a buai a, sawrkar pawh eng emaw chenah a buai hle a, chhuanchham an awm a hlau a; amaherawhchu, COVID-19 hri leng kara sawrkar hmalakna chhuanawm tak chu ni 100 inhlawhna hlawhtling taka a kalpui hi a ni,” a ti a. “Hemi bakah CSS leh state matching share hmuh that kum niin BADP-ah additional fund hmuh a ni bawk a ni,” a ti bawk. Minister chuan, “DRDA hnuaia post 92 absorption pawh hun rei tak atanga thawktute lo nghahhlel chu tun kum tharah hian a hlawhtling hman beisei a ni bawk a ni,” a ti a.

Minister chuan hriatna tihpunnaah tang zual tur leh technology changkang zawkin a kenpuite man pha tura tan la zel turin thawktute a fuih thar bawk a. Sawrkar hnathawh chu chanvo hlu tak a ni tih hre thar a, taksa hriselna tichhe thei lakah fimkhur turin leh hun vawn dik ngai pawimawh zel turin a chah bawk a ni.