August 12, 2023; Rajya Sabha MP K. Vanlalvena'n an telna NDA an thlawp lo chu NDA lamin an helh hle a a hriat thu a sawi.

Vawiin a Mizoram lo thleng, Aizawl press club a amah lo lawmna hun buatsaih ah thusawiin, MP K. Vena chuan, Rajya Sabha an thutkhawm chhung zawngin Manipur chungchang sawiho tura ngenna ni 3 vel tih loh chu dan ang thlap a a thehluh ziah thu a sawi.

Thuthar thehdarhtute zawhna chhangin MP chuan NDA a an telpui MP thenkhatten NDA lam thlawp tura an ngen thu te sawi bawkin, NDA lam an thlawp ta lo kha NDA lam chuan an helh viau in a rin thu a sawi bawk.

"Kan chief minister in Manipur chungchangah chuan khawi hmunah pawh NDA dodal turin min ti," K Vena chuan ti bawkin, CM chunga a lawmthu te a sawi.

"Parliament a thu ka sawi a, chairman in ka microphone a off hnu khan tribal MP ka nih ang ngeiin ka kut ka khawr a, theihtawp chhuahin ka au zui a, khatiang ang reng reng khan ka la au ngai lo, Manipur chungchang an sawi dan te avang khan ka thin a rim em em a, microphone off a nih avang khan ka thusawi zawng zawng hmun 7 a then a hmun 1 pawh a ri chhuak lo," a ti bawk.