Aizawl: Covid-19 hripui leng mek avanga India ram puma inkharkhipna kalpui mekah nimin khan Prime Minister Narendra Modi chuan India rama state Chief Minister te leh Union Territory a Lt. Governor te chu video conference kaltlangin a kawm a. State hrang hranga hmalak dan te leh kal zel an duh dan te ngaithlain, Prime Minister chuan a tam zawkin inkharkhipna kalpui zel an duh angin kar hnih chhung dang kalpui turin ruahmanna siam a nih tur thu a sawi.

Mizoram Chief Minister Zoramthanga pawh he video conference-ah hian telin, Health Minister Dr. R. Lalthangliana, Home Minister Lalchamliana, Chief Secretary Lalnunmawia Chuaungo, Home Secretary, Health Secretary leh Director General of Police ten an tawiawm a ni. Prime Minister chuan hrileng avanga ei leh bar lamin nasa taka a tawrh phah chu tiziaawm tur leh, thawktute hriselna ngaihtuah chung zela hmalak ni se tiin state te a chah a. Industry-te chuan an mi rawihte tan an hnathawhna hmunah ei leh in bakah riahhmun buatsaih theih dan te, black market leh bungraw chheprelh a awmloh nana hmalak a pawimawh thu te sawiin, agriculture lam ngaih pawimawh a tul thu a sawi bawk.

He video-conference meeting ah hian hripui leng avanga harsatna tawk nasa leh buai zual, a vei tamna leh thi awmna state hruaitute chu thu sawina hun a pe a. Hripui donaa an hmalakna leh dinhmunte bakah hmabak la awmte an sawi hlawm a. Mizoram chuan case pakhat chauh a la neih avangin a sawi ve lo state zingah a tel a ni.

He video conference zawh hian Chief Minister Zoramthanga chuan phalna nei lova ramri kan chungchangah khauh taka ramri ven hna thawk turin Home Department hotute a hrilh a. He natna hrileng do hneh tur chuan mipuite kan zavaia kan tanrual a tul thu a sawi a ni.