August 8, 2022; Mizo thla chhiar 'Thlazing' (August) a ni chho mek a, a kar 1 na chu kar malsãwm lo tia chhiar theih a ni. Hmun hrang hrangah chhiatna thleng a nunna chan an awm nual a, hmun hrang hrangah leimin vanga chhiatna thleng a awm bawk. Hetihlai hian August ni 2, 2022 zan a an chuanna car Tlawnglui a chesual, C. Lalfakzuala @ Mafaktea (39) H/o Rebecca Lallawmzuali leh a fapa Malsawmkima (10) te chu Mizo dan anga ni 7 zawn an nih hnuah hmuh an nih loh chuan naktuk tlai dar 3 ah vui an ni dawn.

ZALEN in a chhinchhiah chinah, kar kalta chhung khan lirthei chesual a nunna chan mi 5 awmin, chung zinga mi 2 te chu, August ni 2, 2022 zan dar 6:30 bawr vel a Sihhmui kai a chesual niin, a khalhtu leh motor neitu ni bawk Mafaktea te pafa chu he thu ziahlai thleng hian hmuh an la ni lo.

Lirthei chesual a thihna thlenna hmun te chu, Sihhmui kai bakah, Phunchawng melkua, Lawipui thlanmual road bakah, Tuikhurhlu leh Tuirial inkar te an ni. 

Kar kalta chhung khan tui tlahlum mi 2 awm bawkin, pakhat zawk chu Lunglei thlang, Ranga li, Nghasih luiah hmuh a ni tawh a, August ni 6, inrinni a Mat lui a tlahlum, Thenzawl vengchhak tleirawl kum 15 mi erawh he thu ziahlai thleng hian zawn mek a la ni. Hengte bakah hian thia hmuh/ ruang chhar mi 2 an awm bawk.

Hetihlai hian August ni 2, Thawhlehzan dar 6:30 bawr vel a Sihhmui kai a car chesual a tel Mafaktea te pafa chu Central YMA ruahmannain ni 6 chhung zawn an ni tawh a, August ni 7, Pathianni zan khan an chetsualna car chu Sihhmui kai, Leidawh hnuai atangin lakchhuah a ni. Mizo dan a ni 7 zawn an nih hnuah hmuh an nih loh chuan naktuk tlai dar 3 ah an chetsualna hmun, Sihhmui kai, Leidawh bulah vuina hun Central YMA chuan a buatsaih dawn.

Ruahmanna siam lawk a nih dan chuan, Central YMA vice president Lalhmachhuanan kaihruaiin, R. Lalngheta, Central YMA president bakah, chhungkaw lam atangte bakah, Chaltlang Lily veng Branch aiawh ten thu an sawi ang a, Chatlang bialtu Salvation Army, Commanding officer (CO) Maj. J. Liankhaman thuchah a sawi ang.

Mafaktea te pafa zawn hna erawh chhun zan zawmin, ngawrh tak a thawh mek zel a la ni a, an chetsual zan atangin zan tin tlaivarin Tlawng dung hmun engmawzat a venbuk ah mi tlawmngaite an thawkchhuak a, hemi chungchangah hian Central YMA president chuan, Mizo tlawmngaihna a la ropui reng tih sawiin, tui thiam ten thihngam lu pu a an beihna te chu lawmawm an tih thu ZALEN a hrilh.