Aizawl; Mizoram sorkarin Mizoram leh Manipur-a kawlphetha hman man (power tariff) bithliahtu, Joint Electricity Regulatory Commission for Mizoram and Manipur (JERC)-ah kum 2022-23 atan kawlphetha hman man ennawn a, tihsan a rawt chungchangah sawiselna ziaka thehlut mi mal leh pawl panga an awm tawh.

January 28, 2022 khan Power & Electricity department chuan kawlphetha hman man tihsan an rawt thu leh sawiselna leh rawtna JERC-a thehlut duh tan February 20, 2022 thleng hun hawn a nih thu an lo tar lang tawh a, sawiselna leh rawtna thlentuten hmaichhanah an duh angte an sawina hun (public hearing) buatsaih leh tur a ni a, Power & Electricty department lamin an duh dante an sawi ve bawk dawn a ni.

Mizoram sorkar chuan kawlphetha man 21.05%-a tihsan a rawt a, sorkarin rawtna a siam anga power tariff tihsan a nih chuan sorkarin a subsidise hnuah chawhrualin power unit khat man Rs. 8.80 a ni dawn a, tariff hman mekah chuan unit khat man Rs. 6.71 a ni

Sorkar kum kal mek, 2021-22 power tariff atan Mizoram sorkar chuan nikum 2021 khan 41.92% a tihsan a lo rawt tawh a; mahse, JERC chuan Mizoram sawrkar rawtna chu pawm loin, 20.68%-in a tisang.

Power & Electricity department chuan electric hman man, tariff thar tura rawt atanga sum hmuh belhin department in revenue a hmuh tur zat a hmuh tlin loh thinna a tihziaawm beisei a nih thu hriattirna an tihchhuahah an tarlang tawh a, electric hman hman tuna rawtna anga tihpun a nih chuan rate hman mek lai aiin cheng vbc. 75.83 hmuh belh tura chhut a ni.

JERC hotute hnen atanga ZALEN thudawn danin, nimin thleng a ziaka sawiselna an dawn zat chu panga niin, chungte chu mi mal atangin pakhat, political party atangin ZPM, MPYCC, MPC leh NGO atangin Central YMA te an ni.