Mizoram hi tlangram a ni a, state dangte nena inkalpawhna kan neih chhun leh pawimawh ber chu kawng hi a ni. Rel chuan kan ram chhung lut mah se buhfai phur atan lo chuan kan la chhawr tangkai tawk lo hle a, thlawhna lamah pawh airport chu nei mah ila zin veivahna atan chauh hman a ni hrih a, tuipui lamah tlawhpawh theih kan nih loh bawk avangin Mizoram tan chuan kawngpui tha hi a pawimawh lehzual a ni.

Kawngpui tha chungchangah pawh kan chak lakna ber leh state dang te kawngpui thaa kan pawh theihna awmchhun chu National Highway 54 hi a la ni hrih. He kawng hi Mizoram tan chuan a pawimawh em avangin thu leh hla pawh a ngah a, politics thilah pawh inbeihna a tam hle thin reng a ni. Tunhnaiah pawh he kawng hi a chhiat em avangin bungraw phur lirthei te chu an tlan duh lo a, hei hian mipui titi pawh a tihtam phah hle a ni.

Kawng enkawltu PWD lam chuan leimin awm vanga repair hna hi a hun takah thawh theih a nih loh avanga kawng hi chhe zual ta anih thu leh tunah chuan khuarte hi ngawrh taka hnawh mek a nih thu te, khuain a zir chuan kar hnih chhung vel chuan a chhe zualpui hi zawh hman beisei a nih thu te an sawi a, an thil sawi hi a dikna chen awm mah se mipui thlirna atang chuan hma la chak tawk lovah an department lam hi an ngai tho a ni.

Mizoram hi ruahtui tlak tamna state kan ni a, hmasawnna hna thawktu lamin chhuanlama an hman fo chu hnathawh hun chhung (working season) rei lo hi a ni. Hei pawh hi a tehtu azirin a dikin a dik lo ve viau mai. Mizoramah hian dan tlangpuiin October thlaah chuan ruahtui hi a hul tawh a, May thla vel thlengin working season hi a awm tihna a ni a, chuti a nih chuan thla 7 vel chu hnathawhna hun a awm tihna a ni. Tuna kan kalphungah hi chuan working season a intan hunah bungruate kan lakhawm leih leih chauh mai a, hetiang a nih chuan hnathawhna hun hi a tlem lo thei lo a, working season a hna thawh tan nghal theih turin hmanruate hi lo chhawp lawk ni ta se chuan tun ai hian hnathawh hi a chak phah ngei a rinawm. Kawng siam tlo loh chhan an sawi zinga mi ‘Mizoram lung a no’ tih pawh hi state dang atang hian lung tha zawk chah luh dan zawn ni thei se a duhawm hle.

Engpawhnise tun dinhmunah chuan NH 54 bak hi mipui chakkhai lakluhna kan nei lo a, kawng chhia a ni emaw state dang te nen intih thiam loh palh ni khuaah pawh harsatna thleng thei reng a ni. Chuvangin sawrkar hian state dang leh thenawm Myanmar leh Bangladesh atanga mamawh chawkluhna tur kawngpui tha hi a rang lamin ngaihtuah se a duhawm hle.