July 28, 2022; Khawthlangtuipui group YMA tukin a thukhawm chuan, Lunglei - Tlabung NH 302 siam tha turin ni 2 chhung hun an bituk a, kawng  chhiat vanga nunna chan mi 2 te pawh zangnadawmna pe ngei turin an phut.

Thuchhuah an siamah Khawthlangtuipui group YMA chuan, tukin dar 7 khan YMA, Khawthlangtuipui group, Tlabung, Zodin, Chawnpui branch OB te'n, Lunglei - Tlabung NH 302 kawng chhe lutuk chungchangah emergency joint meeting an nei a, kawng lai mektu NHIDCL leh a hnuaia thawk te chu July ni 28-29, 2022 chhunga kawng chhe lai siam tha turin an phut a, chumi chhung a an siamtha lo a nih chuan, an bungrua leh an chungah engpawh thleng se mawh an phur loh tur thu an tarlang.

Kawng chhia vanga nunna chanta Lalmalsawma (driver), Lunglei Ramthar leh R. Lalthantluanga, Chhipphir khua te pawh zangnadawmna NHIDCL in pe ngei turin an phut bawk.

July ni 30, 2022, Inrinni ah YMA, Khawthlangtuipui group hnuaia branch hrang hrangte leh truck/pickup owner's leh maxi cab welfate Tlabung te chuan 'hnatlang pui' neih an tum tih an thuchhuah ah chuan an tarlang bawk.

ZALEN thudawn danin, Lalmalsawma, Lunglei Ramthar hi buhfai phur, truck driver niin, kumin January ni 25 khan Lunglei - Tlabung kawngah chesualin a boral a, Lalthantluanga (71) Chhipphir chu hna tul buaipuia Tlabung a zin niin, nimin zing khan Tlabung atanga an khua pana a haw na kawngah, an chuanna lirthei kawng chhia a tang nam tuma a chhuk hnuah chesual palhin, kawng thlangah a tla hlum a ni.