ZALEN July 26, 2025; MNF chuan, hriat theih chinah kumin ang em em a Mizoram chak lakna kawngpui pawimawh a chhiat nasat ṭum leh mipuiten kan tawrh nasat ṭum Mizoramin a la tawng ngai lo tih an sawi.

Vawiina Aizawl Press Club a thuthar thehdarhtute an kawmna-ah MNF publicity board vice chairman J Malsawmzuala Vanchhawng chuan, ZPM sawrkarin motor kawngpui chungchanga record a siam dan hi a chhuanawm loh hle tih sawiin, "Kum 15 daih kawngpui siam tura intiamna te, ZPM a sawrkar chuan a sawrkar tuk atangin kawng a ṭha nghal ang tia intiamna thawm te mipui benga a thangkhawk pawh a reh hmain hriat theih chinah kawng chhiat ber ṭum kan tawng mek ta zawk a ni," a ti.

Heti ang taka mawhphurhna hlen zo lo leh mawhphurhna la ngam lo ZPM sawrkar hi kawng dangah pawh mipuite tan rin ngam a harsa hle tawh dawn tih sawi bawkin, "Tuna hna an ṭan pawh hi mipui nawr kalna avang liau liaua thawk an ni a, lo siamtha pawh nise mipui sum tlingkhawma siam a nih avangin Mizoram sawrkar hian chhuan tur pakhat mah an nei lo," a ti bawk.

#ZalenNews