ZALEN October 31, 2025 : Nizan atang thawh tan Aizawl khawpui chhung kawngpui siam that (resurfacing) hna thawh tan chu PWD Minister Vanlalhlana chuan a hmunah a enfiah a, kawng siam avang hian mipuite ten harsatna an tawk a nih pawhin lo dawh hrâm hrâm turin a ngen. 

Vanlalhlana chuan, "ZPM hian election-ah khan manifesto-ah kan nei a. Chumia hmalakna kal zelah chuan Aizawl khawpui hi a hmasaah chuan paver kal theihna chinah hian kawng tha tak siam hmasak kan tum a, wheelbarrow kal theihna chin pawh siam vek kan tum a. 'October ni 30-ah bul kan tan chat ang' kan ti thin a. Chutiang tur chuan contractor pawh ni 30-a bul tan chat thei turin an rawn inruahman a, zaninah hian bul kan tan ta a ni," a ti.

PWD Minister chuan, "Tunah hian PWD CE, SE, EE leh PWD staff te, a contractor te kan awm a, eng angin nge bul an tan tih kan enho a. Kawng tha kan nei tur a ni tih hi kan duh dan a ni a. Keini official-te mai bakah Local Council te, NGO te pawh telin, a chhah lam te, temperature dik tak a ni em tih te leh a quality te pawh hi engtik lai pawhin kan check dawn a ni. Kawng tha kan neihna tur chuan tunhma ang lo deuh hlekin kan kalpui dawn a, a quality-ah hian mipui pawh kan strict em em dawn a ni tih te kan inhriattir thar leh a ni," a ti. 

"Zanina hma an han lak chinah hian kan lawm viau a. Lung te pawh chang tha deuh hmang turin kan inhriattir a. Zan tin an thawk ang a, mipuite paw'n harsatna kan tawk a nih pawhin lo dawh hrâm hrâm ila, kawng tha kan neihna tur a nih chuan thawktute pawh lo tawiawm ila, a quality-ah erawh chuan i duhtui ang u," a ti bawk.

Nizan khan PWD SE Office kawt atanga Ramhlun main road thleng zawh hman tur a tih a ni. 

He hunah hian contractor Pratik Godha, Nidhi Creative Infrastructure Pvt. Ltd. chuan he hna thawk tura an inbuatsaihna leh hmalak an tum dan a sawi a. Mizoram PWD CE Robin Lalrinawma leh Central Circle SE Lalrinngheta bakah Ramhlun Venglai Local Council Chairman Lalremsanga pawhin thu an sawi a ni.