Aizawl : Vawiin October ni 26, 2022 (Nilaini) chhun khan PC Party hruaitute chu an Office-ah thukhawmin, Mizoram kawng chhe chungchang kan sawi ho a. President Vanlaruata chuan, “Kawngpui ṭha neih dan tur hi kan hria a ni,” a ti.

Kalkhawmte chuan kawngpui kan nei tha lo pawi an ti a. Sawrkara thuneituten kawngpui chhiat chhan an sawi thin an pawm loh thu te, kawngpui chhiat chhan langsarte chu - eirukna te, kawng siam nana hmanraw hman that tawk loh vang te, sawrkarin hna thawktu a ngam lo te, kawng siam thatna tur sum a tam tawk loh vang te nia an ngaih thu an sawi. 

Kawngpui tha kan neih theih nan sawrkar huaisen leh a ngaihna hria kan mamawh an ti. Ruata chuan, “Inthlan dawnin party-ten kawngpui tha kan tiam thin a, sawrkarna changtuten kawngpui tha min pe leh thin si lo hi sawrkar huaisen loh vang leh a ngaihna tak tak hriat thin loh vang a ni. Kawngpui tha kan neih theih nan, Department chhut danin, kawngpui enkawlna atan kum tin cheng vaibelchhe 230 vel kan mamawh laiin kawngpui enkawl nan cheng vaibelchhe 40 bawr chauh sawrkarin a dah thin a. Hemi siam tha tur hian keini chuan a ngaihna kan hria a ni,” a ti a. 

PC Party president chuan, “Tunah hian inthlan hmachhawn turin party-te kan inbuatsaih leh mek a, kawngpui tha kan tiam leh hlawm ang. Eng angin nge kawngpui ṭha nei tur chuan hma lak kan tum hlawm mipuiin an hriat a ngai a. Mipui kan dil chhut a, kawngpui tha tiamtute chu eng anga hma lak nge an tum kan zawh chian ngam a ngai a ni,” tiin a sawi bawk.

PC Party chuan, "Kawngpui tha neih hi kan policy pui pakhat niin Six Basic Needs-ah pawh a awm thlap a. Kawngpui tha kan neih ngei nana hma lak dan tur hi kan hria a. Kawngpui tha duh chuan sawrkarna min pe se, kawngpui tha chu kan nei ngei ang," an ti.