Aizawl May 12, 2024 : Kolasib District Land Owners' Association (KDLOA) hruaitute chuan, National Highway, Vairengte leh Sairang inkar kawng zauh tura harsatna awm chungchang ah sawrkar laipui a NHIDCL thuchhuak an ngaichang mek tih an ZALEN an hrilh.

KDLOA hruaitute chuan kawng zauh tura harsatna awm chungchang-ah Forest department bakah, Mizoram sawrkarin an tih tur ang angte a ti fel tawh tih ZALEN an hrilh a, tun dinhmun-ah chuan sawrkar laipui a NHIDCL thuchhuak an ngaihchan mek thu te, Lok Sabha inthlan neih chhoh lai a nih avangin hmalak zung zung erawh a harsa niin an sawi. Kawng zauh tura harsatna awm mek chungchang chu Ministry of Road Transport & Highway lam pawhin NHIDCL kutah an dah nia an hriat thute an sawi.

KDLOA hruaitute hian Vairengte-Sairang inkar kawngpui four lane a laih turah kum 2019 khan an ram lak a ni tawh tih tunhnai a thuthar thehdarhtute an kawmna an lo sawi tawh a, Vairengte-Sairang inkar kawng chu package riatah then a ni a, package 7-8 a la fel lo. A bak zawng Vairengte-Kawnpui thleng hna tan theih a ni tawh. Hetihlai hian ram neituten zangnadawmna an la dawng lo. KDLOA hruaitute chuan, loh theih lohin sawrkarin an ram a lak thu te, an huan thlaite chu hun rei tak chhung an eizawnna a nih thu te, kum thum kal ta atang khan khawih chet phalsak an nih tawh loh thu te an sawi.

Mizoram sawrkar leh forest department in an harsatna tawhte an chinfelsak phutin, Lok Sabha inthlan boycott thleng a hmalak an tum tih an sawi tawh bawk. KDLOA hruaitute sawi danin, ram neitu te hi chhungkaw 1,700 chuang an ni.