Kawngzawh turin MPCC in mipui an sawm
Jul 20, 2023

July 20, 2023; MPCC Action Committee chuan July ni 27, 2023 (Ningani) khian Chanmari kawn, Aizawl atanga Aizawl Tennis Court thlengin, 'SAKHAW ZALENNA HUMHALHNA & ZOHNAHTHLAK UNAUTE THLAVANG HAUHNA KAWNGZAWH' a huaihawt dawn a, he kawngzawhnaa tel tur hian mi zawng zawng an sawm.

Thuchhuah an siamah MPCC chuan, India ramah Uniform Civil Code (UCC) hman tumna chak takin kalpui mek a ni tih tarlangin, tun dinhmunah Manipur State-ah kan Zohnahthlak unauten tawrhna leh tihduhdahna rapthlak tak khawvelin a hriat thamin an tuar mek tih an tarlang.

Manipur-ah Kristiante Biak In thahnem tak hal ral mêk a ni tih tarlang bawkin, MPCC chuan, mi tam takin nunna hlu tak an chan bakah kan unau hmeichhe awmném zawkte pawngsuala saruaka kawngzawhpui an ni chu na an tih thu an tarlang bawk.

"Sakhaw Zalenna Humhalhna & Zohnahthlak Unaute Thlavang Hauhna Kawngzawhna' neih tur hian: kan ram, kan hnam leh kan sakhaw vawn nekchêpa awma nghing lo tura kan tanrualzia lantir mawlh rawh se," tiin an thuchhuah ah chuan an tarlang bawk.

 

Latest News & Chhiar Hlawh