Aizawl: October ni 2, 2021(Inrinni) khan Tuirial Constituency MLA Bye Election lo awm turah 'Campaign kick-off' hun chu Tuirial West Block MNF huaihawtin Kawnpui VC-3 Complex-ah neih a ni a. He hunah hian MNF president Zoram-thanga chuan central sawrkar atangin sum an hmu tlem chung pawhin  Pathian tanpuina zarah harsatna lian tham an la tawk lo niin a sawi.

Campain kickoff-na hunah hian Party hrang hrang INC, MPC, ZPM, NPP atangtea mithar 186 zet  lawmlut paha thusawiin MNF President, Zoramthanga chuan, "Covid avangin kum kaltaah India sorkar atangin kan pawisa hmuh thin cheng vbc 3000 zet kan hmu lo a, kum dang aiin state tinin kan hmu tlem a ni. Mizoramah chuan mihringah mai ni tawh lovin vawk pulh hri thlengin a leng a, ramri a buai a, ram a kangin Myanmar raltlan an lo lut a. Heti chungin Pathian tanpuina in sorkar hnathawk hlawh kan inpe mar tha reng a, gas, buhfaiah harsatna awm lovin kawng chhia tam tak kan thuam tha a ni. India leh khawvelah Covid a hniam zel a, Mizoramah erawh kan la sang rih deuh a. Mahse, kum thar Finnancial Year lamah chuan Covid boruak pawh a ziaawm chhoh ve mai kan beisei," a ti.

SEDP pawh theih ang chin chinah hmalak zel an tum tih a sawi a, tun dinhmunah hmun thuma thena hmun hnih MLA nei an nih avangin, kum 2023 inthlan leh hunah pawh Pathian tanpuinain MNF an tling leh ngei dawn niin a sawi. "Kan sorkar hnuin Aizawl West-I MLA bye election-ah hneh takin kan Candidate Zothantluanga a tling a, mipui pawh an lawmin an bial development atan hma kan la mar chhoho mek reng a ni. Serchhip biala bye election-ah Pu Duhoma a tling a, mahse, West-I lam nen chuan a inang lo ta hle a, a hmaa khawtlang hruaitu hrang hrang ten an mamawh an rawn sawi thin kha an rawn sawi ngai ta reng reng lo mai a, pawi pawh kan ti a, Pu Duhoma an thlangtling a, tihfuh inti zel tak maw?," a ti.

"Tuirial bialah bye election kan nei leh dawn mek a, helai hmun hi four lane kalna tur a niin development a intan dawn chauh a, MLA rulling neih chu intangkaipui ngeiin ka ring a, Pu Dawngtea hi lo thlangtling ula, in tisual lovang," Zoramthanga chuan a ti bawk.

MNF Official Candidate K.Laldawngliana chuan, "Tuirial bial bye election-ah ding tura ruat ka ni hi Pathianin min ruatnaah ka ngai a, Tuirial bial tan hian hmasawnna atan ke pen chhuak turin ka rawn ding a. Pathian leh kan ram tan titu party atangin kei mi tlawm tak min ruat hi ka lawm hle a. MLA fund chauh hi bial hmasawn nan a tawk lo va, rulling party atang hian hmasawnna hrang hrang pawchhuak tura lo ding ka ni a. MNF party chauh ni lo, party dang leh neutral pawh he bial tana hmasawnna atana thawhpuiah ka sawm che u a, min vote theuh turin ka ngen takzet che u a ni," a ti ve bawk.