Aizawl: Serchhip Bawngchawm khaw hluia keite nia hriatin kel tam tak a seh tawh avangin tanpuina pek tumin Forest Deptt. in hma an la mek.

Serchhip chhim lama awm Bawngchawm khaw hluiah Serchhip Livestock Farmers' Cooperative Society ten kel an vulh chu tun hnai hian Keisen nia hriatin 27 a seh avangin Divisional Forest Office, Thenzawl hriattir nghalin a theih anga tanpui turin an dil a. Zirtawpni khan Thenzawl DFO office a ACF Lawmnapari leh Serchhipa RO Lalsangpuia te a hmunah kalin keite ei bang kel ruang thla leh sa hniak thla te an la a, tanpuina awm thei te ngaihtuahsak an tum a ni.

Serchhip cooperative te hian kel 70 chuang nei tawhin, 2018-a Saza hri (Goat pox) leng avang khan kel 40 vel an chan tawh bawk a ni.