President-in chhiatna liana a puan hnuah US Federal Emergency Management Agency chuan Zirtawpni tuk khan tual chhung miten chhanchhuah leh chhawmdawl hna an thawhpui turin a hmun an thleng.

Beshear-a chuan mi eng zatin nge tuar leh chin hriat lohva awm mek zat an la hriat theih loh thu a sawi a. Hmun thenkhat chu 28 state roadways a pin rih avangin tlawhpawh theih an la ni lo tih a sawi.

Zirtawpni chawhnu khan governor chuan unau pali ruang chhar a nih thu a sawi a, a upa ber pawh kum riat mi chauh niin a naupang ber chu kum khat a ni.

Heng unaute cousin, Brittany Trejo chuan Lexington Herald-Leader hnenah an chhungkua hian Ningania an in tuiin a lak hnuah thingkungah himna an dap ta niin a sawi a. Tuiin naupang a lak hnuah an nu leh hi darkar riat lai puihna an hmu hma an tang zui.

July 31, 2022 : Kentucky khawchhak lama ruah nasa tak sur hnua tui lian chiamah mi 16 vel an thi tawh niin United States-a he state governor chuan a sawi.

Governor Andy Beshear chuan thi zat an hriat tawh bakah hian an pun ngei a rinawm tih a sawi bawk.

President Joe Biden chuan Zirtawpni khan ‘chhiatna lian’ tia puangin sorkar laipui atanga puihna thawn an ni dawn.

Thi zingah hian naupang paruk an tel a, pakhat phei chu kum khat mi chauh a ni.

He state-ah hian mi 23,000 chuangin power an nei lo mek.

National Guard nen van sang atanga an dinhmun an thlir hnuah Beshear chuan ‘a lo rin aia nasaa chhiatna a thlen’ thu a sawi a. Khawpui hmun thenkhat chu tui hnuaiah a awm a, hmun thenkhat chu tlawhpawh theih an ni lo tih a sawi.

Kar hmasa tir lamah khan ruah tam tak an dawng a, a hnuah tui hi a lian ta chiam a. Kentucky-a chenna in tam tak tui lian hian a la niin governor chuan a sawi.

Hmun thenkhat chuan darkar 24 lek chhungin ruah inches riat aia tam mah an dawng hman a ni.

Kuntucky khawchhak lam leh Tennessee leh West Virginia hmun thenkhatah chuan Zirtawpni chhun (India-a Inrinni chawhma) pawh khan tui a lian thei tiin inralrinna dar la khawn a ni.

Kartawpah hian lui tam tak chu an kuang a la luan liam rin a ni a, US National Weather Service chuan tui lian nasa leh chhiatna nasa a la thleng thei reng niin an sawi.

Tun kar lo awm turah pawh ruah hi a la sur dawn niin an sawi a. Hei vang hian Beshear chuan mipuite chu an sahimna ngaihtuah turin a ngen.