ZALEN February 24, 2025 : Joint YMA, Kawlkulh chuan thuchhuah siamin February Ni 22, 2025 (Inrinni) zana Nagaroor (Kerela) hmuna Valentine VL Chhana (23) s/o H. Malsawmtluanga, Pangzawl khua in vanduaithlak taka Lawmsangzuala s/o Vankhawpuihluna, Kawlkulh khua kut tuar a, nunna a chan chu pawi an tih thu an tarlang a, Valentine VL Chhana'n a kalsan tak a chhungte leh Pangzawl khaw mipuite an tawrhpui tih an tarlang.

Joint YMA, Kawlkulh chuan, "Kan member pawikhawihna thleng chungchangah hian Valentine VL Chhana chhungte leh Pangzawl khaw mipuite leh Mizoram hmun hrang hrang a he thihna avanga rilru na zawng zawngte chungah ngaihdam kan dil tak zet a ni," an ti.

"Valentine VL Chhana'n nau ang maia a en laka thihna hial a chunga thleng hi Joint YMA, Kawlkulh chuan a dem takzet a ni. He thihna avanga rilru hliam zawng zawngte, thihna tuartu chhungkûa leh Pangzawl mipuite hnenah kan pawikhawihna avang hian thupha kan chawi a, in rilru kan tihnat na-ah ngaihdam kan dil takzet a ni. He thihna in a nghawng zawng zawngte chungah Pathian awmpuina lo thleng se tih hi keini Kawlkulh khawtlang mipuite tawngtaina a ni," an ti bawk

Kawlkulh Joint YMA te chuan he pawikhawihna thlentu Lawmsangzuala chhungte pawhin hreawm an ti a, an zak takzet a. Pathian awmpuina an chan theih nan tawngtaipui turin Zoram mipuite an ngen bawk.