August 22, 2022; Mizoram hmun hrang hrangah District Magistrate ten an huamchhung ah dan ang ni loa Myanmar kuhva lakluh leh phurh an khap tawh a, hetihlai hian kar kalta chhung khan Mizoram chhung hmun thenkhat ah dan loa Myanmar kuhva lakluh bag 395 man a ni.

August ni 16, 2022 khan police te chuan an thudawn bawhzuiin, Myanmar kuhva bag 130 (bag khat hi kg 75/80 zel) chu Tripura lam panpui tuma TATA Truck, Buanthanpui (30) s/o  Ziona, New Vervek khalh lai atangin Zawlnuam-ah an man a, dan anga hmalak zui turin Custom Preventive Force kutah an hlan.

August ni 20, 2022 zan khan Khawzawl PS team te pawhin Tuipui, Khawzawl District bulah Myanmar kuhva bag 265, kg 10,600 vel, lirthei panga (SK tipper-2, LPK tipper-1, SML tipper-1, SK610 -1) atangin an man bawk a. Kuhva neitu Lalhmangaihzuala (43) s/o Kapthula, Ruantlang, Champhai leh lirthei khalhtute pawh man an ni. Heng thil tawlh rukte hi Ruantlang kudam atanga Vairengtea phurh thlak tum, Champhai Police check post hela kalpui an ni. 

Kar kalta chhunga Myanmar kuhva man zat hi bag 395 a tling a, thudawn danin, dan loa lakluh kuhva te hi Mamit district chhung paltlang a Tripura ah phurlutin, chumi atanga Assam a lakluh tumna a awm thin niin a lang a, tunhnai ah pawh Zamuang khua ah Myanmar kuhva hi tum hnih man a lo ni tawh a, hengte vang hian 'Kuhva Chingtu Pawl, Hachhek bial' chuan Mamit DC hnenah Zamuang khua ah police check gate siam tura ngenna tunhnai khan an thlen a ni.