ZALEN March 11, 2025 : Women & Child Development, Government of Mizoram chuan vawiin khan International Women’s Day Lawmna leh Zakapa Award semna hun an hmang a, International Women’s Day lawmna puala Mizo Lal huaisen, hmeichhiate humhimna kawnga thawhhlawk, Zakapa hming chawia Award siam Zakapa Award chu Khatla South nu Khawlrinpuii hnenah hlan a ni.

Khawlrinpuii hi February 14, 1959 khan Arte khuaah a piang a, a fate nen Khatla South ah hian an cheng mek a ni. Lehkah zir sang ni lo mah se, hmeichhia leh naupangte humhalhna kawngah theihtawp chhuahin hma a la thin a, hetiang lam hawi training ATI-in an buatsaihah te pawh a tel hram hram thin a ni.

Thenawm khawvengah nupa buai te, fa inchuh te leh harsatna dang a awm pawha koh ber a ni thin a, hmeichhia humsual dai Home-a dah ngai buaipui te, naupang Home-a dah te leh a tul dan anga FIR thehluh te leh midangte himna tura Child Welfare Committee, Women Commission leh Home hrang hrang tlawh te hi a hnathawh langsar deuh deuhte an ni a. Heng a hnathawh that avang hian MHIP Khatla leh MHIP Gen Hqrs te pawhin chawimawina an lo hlan tawh a ni.

Dawrpui Multipurpose Centre, Dawrpui Aizawla hun buatsaih-ah hian Lalrinpuii, Minister, SWTA & WCD chu khuallian niin Baryl Vanneihsangi, MLA leh Prova Chakma, MLA te chu khual zahawm an ni. Pi Lalzarmawii, IAS, Commissioner & Secretary, SWTA & WCD chuan hun kaihruaiin He ni puala buatsaih chawimawina dawng mi 33 te hnenah Women Awardees for IWD Awards 2025 hnuaiah award te hlan a ni.